Prosesu Harii Moris Di’ak, Feto Tenke Iha Oportunidade Hanesan Mane

DILI, (TATOLI) – Prezidente Repúblika (PR), Francisco Guterres “Lu-Olo,” apela katak feto tenke iha direitu hanesan ho mane sira atu partisipa iha festa demokrasia, iha prosesu harii moris di’ak iha Timor-Leste.

“Partisipasaun feto importante hanesan ho mane sira iha prosesu hotu tantu harii moris di’ak iha nasaun no ba kada família, hanesan oportunidade ba asesu, partisipasaun no promosaun iha nivel responsabilidade hotu, oportunidade atu kontribui ba prosesu harii nasaun seguru no buras liu no bele garante no respeita feto sira nia dignidade,” PR, Lu-Olo hato’o iha nia intervensaun ba semináriu ho tema “Feto nia votu determina futuru nasaun,” Delta Nova, Segunda (26/03).

Tuir PR Lú Olo Eleisaun Antisipada (EA) ne’ebé sei akontese iha 12 Maiu importante tebes atu bele harii sosiedade ne’ebé inkluzivu eh hakuak ema hotu, livre no moris di’ak liu tan ba ema hotu tantu feto ho mane.

Nune’e, sidadaun hotu tenke prepara-an atu vota hodi hili reprezentante sira iha Parlamentu Nasionál liuhosi prosesu demokratizasaun. Prosesu polítiku tenke sai instrument atu halibur ema hotu hodi hadi’a lais rai ida ne’e no hamutuk ita bele hetan kondisaun moris di’ak liu tan ba povu tomak.

“Ita hotu hamutuk, mane no feto sei dezenvolve ita nia rai no garante futuru ida ne’ebé di’ak liu tan ba ita nia oan sira,” Lú Olo fó hanoin.

Feto no mane tenke servisu hamutuk no tenke valoriza partisipasaun feto nian hodi dezenvolve ekonomia, administrasaun públiku iha setór privadu emprezariál no iha área rurál.

Atu hala’o dezenvolvimentu ho di’ak presiza hato’o informasaun ba feto sira atu involve bainhira implementa polítika kona-ba uma, bee no saneamentu, saúde públiku no edukasaun.

Feto sira tenke tama iha prosesu dezenvolvimentu tanba nu’udar nesesidade estratéjiku atu hetan objetivu dezenvolvimentu sustentável ne’ebé estabelese inklui diversifikasaun ekonomia nasionál ne’ebé sei depende beibeik.

Enkuantu, iha konstituisaun Repúblika Demokrátika Timor-Leste (RDTL) hatuur prinsípiu katak sidadaun hotu, feto ka mane iha direitu hanesan maibé iha ita nia sosiedade feto sira seidauk iha oportunidade hanesan ho mane sira atu hala’o sira nia direitu, nune’e atu valoriza feto sira tenke promove sira nia partisipasaun iha prosesu harii nasaun no hametin konstituisaun.

Feto sira iha responsabilidade hodi tau matan ba oan sira nia edukasaun, saúde no uma laran nian, enkuantu maioria feto maizumenus ho porsentu 70 servisu iha área rurál.

Biar nune’e, feto sira iha área rurál importante ba ekonomia uma laran nian maibé feto sira seidauk hetan oportunidade hanesan mane sira atu partisipa iha prosesu dezenvolvimentu ba prioridade nasionál.

Atu bele iha dezenvolvimentu sustentável importante tebes mak ema hotu tenke asesu ba bee moos.

Kualidade bee nian no saneamentu públiku nian fó impaktu ba saúde komunidade inklui hamenus labarik sira mate barak.

Jornalista: Zezito Silva | Editór: Manuel Pinto

Imajen: PR Lú Olo partisipa semináriu ho tema “Feto nia votu determina futuru nasaun,” Delta Nova, Segunda (26/03).