Dom Basílio: “Ha’u fó konsellu ba Alkatiri”

Bispu Diocese Baucau, Dom Basílio do Nascimento, Pr, deklara, nia fó konsellu ba Marí Alkatiri, maibé la’os fó apoia.

Deklarasaun ne’e Dom Basílio do Nascimento hato’o hodi responde ba notisia balun ne’ebé publika iha média sosial katak durante ne’e nia fó apoia ba Mari Alkatiri nu’udar Sekretariu Jeral Partidu FRETILIN.

Dom Basílio hateten, konsellu ne’ebé nia fó ba Mari Alkatiri iha momentu hetan vizita husi Alkatiri, tanba Marí rasik mak husu hanoin ba nia nu’udar bispu, maibé la signifika fó apoia.

“Ha’u hakarak aproveita okaziaun hodi desmente buatida, ita boot sira publika, surat ne’e iha ha’u nia liman dehan Dom Basílio Prezidenti Episkopal timorense nia hateten igreja apoia Dr. Mari Alkatiri, deskulpa ne’e bosok. Ha’u koalia ho Dr. Alkatiri iha momentu ida Dr. Alkatiri husu ha’u nia opiniaun hanesan konsellu ida. Ha’u fó ba Dr. Alkatiri hanesan konsellu agora fó konsellu ne’e la signifika katak ha’u apoia ba Dr. Alkatiri, votu sekretu,” hateten Dom Basílio do Nascimento ba jornalista sira hafoin hamutuk ho bispu Diocese Díli, Dom Virgílio do Carmo da Silva, SDB hasoru malu ho Prezidenti Repúblika, Francisco Guterres Lú Olo iha Palácio Prezidensial hodi koalia konaba situasaun atual no oinsa bele hamutuk garante nafatin paz no estabilidade iha Timor Leste (TL).

Tuir Dom Basílio nutísia ne’ebé publika husi média sosial balun ne’e bosok, tanba igreja durante ne’e sempre hamriik independenti no la inklina ba partidu ka ema ruma.

Tanba ne’e atual Bispu Diocese Baucau ne’e husu ba media nacional sira atu hatudu nafatin profisionalizmu hodi haree didi’ak notísia sira antes publika iha média.

“Ne’eduni halo favor semak tau notísia ida ne’e haree didi’ak ba. I depois ida seluk fali dehan Prezidenti Episkopal timorense apoia FRETILIN ida ne’e terlalu, ne’e mós bosok oituan, bosok oituan la’e, ne’e bosok kompletu. Hotu-hotu mesak katóliku, uma kreda laiha buatida atu tama iha vida polítika, maibe ha’u hakarak aproveita okaziaun hodi dehan fó konsellu ida ba Dr. Alkatiri tanba Dr. Alkatiri husu konsellu ne’e la signifika katak apoia Dr. Alkatiri ou apoia FRETILIN, buat sira ne’e tenki klaru hanesan bee para ita hotu bele hatene loloos, la’e horsida ita boot sira fó informasaun laloos, la’os profisionál,” Dom Basílio esklarese. ías

GMN TV | Grupo Média Nacional