MNEK Realiza Semináriu Kona-ba Konflitu iha Saara Osidentál

DILI, (TATOLI) – Ministériu Negósiu Estranjeiru no kooperasaun, liuhosi Diresaun ba Europa, Áfrika, no Médiu Oriente (DEAM) Realiza Semináriu Ida Kona-ba: “The Conflict on Western Sahara: Perspectives, Current Situation and Prospects of Solution”.

Diresaun-Jerál Asuntu Bilaterál, liuhosi Diresaun ba Europa, Áfrika, no Médiu Oriente (DEAM) organiza semináriu ida ho asuntu polítika globál mundu ohin loron, espesifikamente liga-ba konflitu polítiku ne’ebé agora dadaun povu Saara Osidentál (Western Sahara) infrenta.

Iha Semináriu ne’e, Embaixadór Saara Osidentál mai Timor-Leste, Mohamed Slama Badi halo aprezentasaun kona-ba konflitu iha Saara Osidentál ne’e rasik, situasaun atuál, perspetivas no solusaun.

Diretora DEAM (Diresaun ba Europa, Africa no Médiu Oriente), Josefina Tilman iha intervista hatete objetivu prinsipál hosi semináriu ne’e maka hatudu ita-nia solidaridade ba Saara Osidentál ba sira-nia problema no sufrimentu ne’ebé maka durante ne’e sira hasoru, ne’ebé uluk ita mós infrenta ho ita-nia viziñu di’ak Indonézia.

Iha tempu hanesan Diretora mós esplika objetivu seluk maka fo hanoin fali mai ita atu labele haluha sira-nia luta ba sira-nia auto-determinasaun hanesan ita uluk infrenta.

“Kria konsiénsia ida sobre disputas de direitu Internasionál ne’ebé liu ona tinan 40. Ita hatene katak Saara Osidentál nia povu mós terus hanesan ho ita Timór, istoria no politikamente hanesan loloos ho istória ne’ebe povu Timór infrenta iha tempu pasadu”, hateten.

Diretora Josefina relata bazeia ba Timor-Leste nia konstitusaun iha artigu 8 fó dalan no ko’alia momós katak ita nudar sidadaun ida tenki respeita direitu de auto-determinasaun, soberania permanente ho independénsia ba kada nasaun ida-ida.

Ho ida ne’e maka ita hanesan timoroan sempre firme iha ita-nia pozisaun no desizaun tuir mandatu Estadu atu fó suporta masimu ba ita-nia belun sira iha Saara Osidentál ba sira-nia independénsia.

Alende apoiu nível polítika, Governu Timor-Leste mós bazeia ba rezolusaun Parlamentu (n.o2/2011 2 de Marco) hodi fó apoiu finanseiru ho totál orsamentu rihun US$ 70.000 ba estabelesimentu embaixada iha Timór ne’ebéke harii desde tinan 2010, no Governu Timór kontinua aloka osan kada tinan ho totál rihun US$ 50.000 ba embaixada Saara Osidentál.

Saara Osidentál geografikamente lokalizadu iha parte ida hosi kontinente Afrika ne’ebéke seidauk hetan ninia soberanu lolo’os, Iha parte leste besik ba nasaun Aljeria no iha parte norte besik ba Maroko no Mauritania.

Semináriu ne’e realiza iha Salaun Nobre-MNEK iha loron, 20 abril 2018, alende funsionarius no diplomatas-MNEK, marka prezensa mós iha semináriu ne’e, estudantes universitáriu sira hosi Universidade Nasionál Timor-Leste no Universidade da Paz no Amigos Solidariedade do Povo Sahara Osidentál iha Timór.

Depoisde hare reasaun ka espresaun partisipantes universitáriu sira ne’ebéke partisipa iha eventu refere, Universitariu sira husu atu diresaun atu habelar liután semináriu iha nivel universidade sira iha tempu oin mai. (KI)