sexta-feira, 27 de abril de 2018

Timor-Leste aumenta pozisaun iha índise liberdade imprensa nian

PARTILHAR

Timor-Leste aumenta pontu tolu iha índise ba liderdade imprensa nian hosi organizasaun Reporters sans Frontières (RSF), no sai hanesan nasaun hosi Sudeste aziátiku ne'ebé iha pozisaun di'ak, kuaze fatin 30 dahuluk hosi viziñu Indonézia.

Iha relatóriu 2017 nian, ONG destaka ona katak laiha jornalista ida maka kaer iha Timor-Leste dezde restaurasaun independénsia nian, maski refere dalan presaun oioin ne'ebé maka halo nafatin hasoru jornalista sira.

Presaun sira ne'e, "uza hodi impede jornalista sira hodi serbisu livre", inklui asaun legal intimidatóriu sira, violénsia polísia nian no krítika sira ba órgaun komunikasaun sosial sira ne'ebé halo hosi funsionáriu sira Governu nian ka deputadu sira.

RSF konsidera ona kriasaun hosi konsellu imprensa ida hanesan "dalan ida iha diresaun loloos, maski hosi rezerva sira ne'ebé hatudu hosi 'media' kona-ba oinsá hili nia membru sira".

Ba ONG, merese ona nota negativu ba lei imprensa ne'ebé "konstitui ameasa permanente ida ba jornalista sira no fó korajen ba autosensura".

RSF afirma katak hein atu, hafoin eleisaun loron 12 Maiu, "Governu foun kontinua hatudu prova konkretu sira intensaun nian hodi lori Timor-Leste aumenta nafatin nia pozisaun iha índise ba liberdade imprensa mundial nian".

Maski sa'e fatin tolu, ba pozisaun 95, Timor-Leste lakon ona pontu rua iha "folin" índise nian, hosi 32.82 ba 30.81.

Iha Ázia, klasifikasaun destaka ona aumentu hosi fatin 20 hosi Koreia-Súl, ba fatin 43, fatin ida ki'ik liu hosi Taiwan no halakon Japaun ho fatin 15. Hong Kong okupa fatin 70.

Iha rejiaun Sudeste Aziátiku ho Pasífiku nian, destaka ba postu 53 hosi Papua Nova Guiné no 57 hosi illa sira Fiji nian. Hafoin Timor-Leste, mosu Indonézia (fatin 124), Filipina (fatin 133) Myanmar (fatin 137), Tailándia (fatin 140), Kamboja (fatin 142), Malázia (fatin 145), Singapura (fatin 151), Brunei (fatin 153), Laos (fatin 170) ho Vietname (fatin 175).

SAPO TL ho Lusa
PARTILHAR

Author: verified_user

Publicação luso-timorense sem fins lucrativos

0 comentários: