sexta-feira, 27 de abril de 2018

Semana Ne’e Remata Imprime Buletin Votu

PARTILHAR

DILI, (TATOLI) – Ministru Administrasaun Estatál, Valentim Ximenes, hatete Grafika Nasionál sei finaliza imprime buletin votu ba eleisaun antesipada iha semana ida ne’e.

ʺOhin ou aban sira (grafika nasionál imprime hotu ona)ʺ, dehan ministru ne’e ba jornalista sira iha Palásiu Governu, ohin.

Governante ne’e hatutan grafika nasionál imprime buletin votu hamutuk 784,286 tuir rekomendasaun STAE bazea ba númeru eleitór ne’ebé sei partisipa iha votasaun iha eleisaun antesipada.

Eis-dosente Universidade Nasionál Timor-Leste ne’e relata prosesu imprisaun ne’e la’o di’ak no asegura ninia segredu.

“La’o di’ak, ita asegura ninia segredu no servisu hamutuk ho entidade hot-hotuʺ, katak ministru.

Grafika nasionál sei entrega ba Servisu Téknika Administrasaun Eleitorál hodi realiza EA iha loron 12 maiu 2018.

Governu Aloka Milliaun $4.7 ba STAE

Ministru mós haktuir governu aloka osan milliaun $4.7 ba STAE hodi  hala’o servisu tékniku ba eleisaun antesipada.

ʺOrsamentu ne’e másimu ona para STAE bele halo servisuʺ, katak tan. Hosi totál ne’e, STAE uza ba resenseamentu eleitorál, publisidade no seluktán.

ʺEn termu ezekusaun la’o di’ak no laiha obstaklu maski osan ministériu finansa fó ba STAE iha periodu ida badakʺ, tenik Valentim.

Jornalista: Agapito dos Santos | Editora: Rita Almeida

Imajen: Ministru Administrasaun Estatál, Valentim Ximenes
PARTILHAR

Author: verified_user

Publicação luso-timorense sem fins lucrativos

0 comentários: