sexta-feira, 27 de abril de 2018

Solusiona Problema UNITAL, Lere Husu Estudante Hatama Petisaun


DILI, (TATOLI) - Prezidente Fundasaun Asuwa’in Timor-Leste [FUNATIL], Lere Anan Timur, fó solusaun ba preokupasaun estudante nian, kona-ba problema dosente sira la tama aula. Nia husu ba estudante sira entre loron 11-19 Maiu tinan ne’e, hatama petisaun ida ho informasaun kompletu kona-ba problema ne’ebé sira hasoru durante ne’e.

Nune’e, nia, iha kualidade nu’udar prezidente fundasaun bele avalia no fó resposta hodi rezolve imediata, hodi normaliza di’ak liután prosesu aprendizajen no rezolve problema sira hotu. Estudante sira konkorda ona ideia eh hanoin ida ne’e.

Prezidente FUNATIL, Lere Anan Timur, apela mós ba fundadór UNITAL [Universidade Orientál Timor Lorosa’e] sira atu investe osan ona ba iha universidade ne’e, labele parazita no moris de’it ba osan sira ne’ebé estudante sira nian, se lakohi, nia sei investe, tanba responsabilidade morál.

“Se lakohi, ha’u iha responsabilidade ba universidade ida ne’e, debe ema nia osan mós ha’u debe hodi bele investe. Ha’u lakohi para ema estranjeiru sai fali na’in ba universidade ida ne’e, tenke ita Timor. Timor mak tenke sai universidade ne’e nia na’in,” garante fundadór, Lere Anan Timur, perante estudante sira, iha kampus UNITAL, Becora-Díli, ohin.

Prezidente FUNATIL rekoñese katak problema sira ne’ebé mak akontese bebeik iha estabelesimentu ensinu privadu, UNITAL ne’e tanba fundasaun la funsiona, no universidade mak akumula funsionamentu fundasaun nian, hodi halo akompañamentu, supervizaun kona-ba lala’ok universidade nian.

“Ida ne’e mak problema ninia huun. Problema seluk saida? Osan. Osan la iha, tinan uluk, ha’u atu haruka inspesaun mai universidade, primeiru més iha tinan ida ne’e nia laran, atu inspesiona. Atu inspesiona ne’e la’ós atu fó sala ba ema ida ou kastigu ema ida,” informa Lere ba akadémiku UNITAL sira.

“Fundasaun tenke investe. Eleisaun besik ona, la to’o fulan ida, eleisaun mai ona, governu foun sa’e ona. Governu foun mai, universidade tenke iha ona loloos fundasaun ninia okos,” salienta prezidente FUNATIL ne’e.

Nia reforsa katak bainhira Fundasaun Asuwa’in Timor-Leste ne’e, atu funsiona, sei iha estrutura rasik no funsionáriu ne’ebé tantu sei serbisu iha fundasaun nune’e mós iha universidade sei hala’o liuhusi selesaun ida ne’ebé rigór.

Bainhira fundasaun funsiona, ema ne’ebé mak universidade presiza hanorin mak hela, tuir kuantidade estudante, la presiza, sai, nune’e mós funsionáriu sira.

Alunus la iha problema. Ki’ak ka riku, husi ne’ebé de’it fundasaun simu. “Mas, funsionáriu sira mak tenke selesionadu. Nasionalizmu, patriotizmu tenke iha funsionáriu ida idak nia fuan. Disiplina, responsabilidade tenke iha funsionáriu idaidak nia ulun, ninia kakutak, ninia fuan. Kombate oportunizmu, ida ne’e mak fundasaun ninia prinsípiu,” inisiste prezidente FUNATIL, Lere Anan Timur.

Nune’e, dala ida tan, atu funsiona efetivu fundasaun, Lere sei haruka ekipa inspesaun ba universidade ne’e.

“Ha’u atu haruka ha’u-nia ekipa inspesaun, ne’ebé xefiadu husi imi-nia aman Maunana, para hatene moras ne’e husi ne’ebé? Mas, problema nia huun mak ida ne’e, osan ne’e mak atu rezolve dala ida de’it, fundasaun agora tenke investe, ita tenke investe. Ne’e mak primeira opsaun, Matos sira mak hateten beibeik sira agora investe. Sira lakohi, ultimo ha’u mak investe. Ha’u investe para universidade la’o ba oin nafatin,” nia akresenta.

Lider másimu FUNATIL ne’e, reforsa, UNITAL nunka no sei la taka to’o iha ne’ebé de’it, maski ema na’in rua ka tolu eh haat de’it, tanba eskola ne’e uluk nia loke, nia intensaun ba timoroan sira, povu sira tanba ne’e nia haktuir katak rejeita simu osan husi fundasaun.

“Universidade la taka. Ha’u morál la iha, atu riku ho imi-nia [estudante sira] osan. Ha’u uluk loke universidade ida ne’e ba ema ki’ak, la’ós ba ema riku. Tanba ida ne’e mak reitór, ohin bele sai, maibé ha’u tenke buka forma, husik universidade la’o ba oin nafatin,” dehan lider FUNATIL, Lere Anan Timur.

Hodi hatutan katak kuandu dehan universidade ne’e privadu, la’ós estadu nian. Universidade ne’e fundadór sira nian, veteranu sira nian, maibé ida ne’e, iha surat-tahan de’it, la ativu. Uluk Nunura mak ativu iha ne’e, maibé imi duni sai tiha, nia mós la’o halo nia vida. Entaun, sá solusaun mak ha’u agora toma? Imi hakarak, reitór agora sai, la’ós primera-vez imi duni sai ema, beibeik ona.

“Uluk ha’u dehan katak reitór Roberto [Seixas Miranda] mak sai fali, taka universidade, mas ha’u hanoin imi. Se taka imi ba iha ne’ebé? Imi ba komete krime, imi ba komarka. Imi-nia idade sei nurak, imi lakohi lakon futuru, tanba ida ne’e mak ha’u lakohi ida ne’e,” relembra Lere.

Kona-ba ezijénsia estudante nian ne’ebé espresa liuhusi panfletu nune’e mós direta husi estudante sira atu hasai reitór Roberto Seixas Miranda, Lere Anan Timur husu atu estudante sira hakmatek, labele hanoin de’it tuun ka sa’e, maibé fallansu ne’ebé akontese iha universidade tanba la iha investimentu husi fundadór sira.

“Imi sai vítima ne’e loos, atu hatuun reitór, ida ne’e mak sai kestaun ba ha’u. Primeiru, tanba saida mak tenke hatún? Ita ne’e para hatún malu de’it? Maibé, agora oinsá universidade atu la’o ba oin, ne’e mak fundasaun agora tenke investe ona,” nia reforsa hikas.

Iha fundasaun la iha ema ida ko’alia kona-ba investimentu, maibé ko’alia de’it mak estrutura. Estrutura la’ós problema. Estrutura atu funsiona ne’e mak problema. Funsaun oinsá, kuandu kondisaun mós la iha.

Ita-nia kontráriu fali envés fundasaun mak kaer universidade, universidade mak kaer fali fundasaun. Reitór Roberto Miranda Seixas, iha sala ruma hateten de’it, liuhusi surat atu hatene katak nia halo sala duni.

“Alunu sai vítima, problema iha fundasaun. Fundasaun mak sala, estudante sai vítima tanba la iha investimentu. Panfletu ida hatuun reitór, ida ne’e mak dalaruma, aban bainrua dalaruma ita muda tiha universidade nia naran. Hatuun malu hela de’it, bainhira mak ita bele metin? Tanba ida ne’e mak oan sira hakarak sai matenek, tenke ho kualidade, ne’e mak imi-nia futuru,” dehan prezidente FUNATIL, Lere Anan Timur.

Nu’udar prezidente fundasaun, garante sei re-organiza Fundasaun Aswa’in no investe; dala ida tan, hodi labele parazita no moris de’it ho estudante sira osan, para dosente sira ne’ebé universidade presiza, ita presiza, ida ne’ebé la presiza, para sai universidade loloos.

Hatuun reitór, primeiru, hatuun tenke halo sala ruma, se tuir norma, regra universidade ninian, órgaun ida [senadu] foti no hatuun, ikus liu mak nia, nu’udar prezidente fundasaun, kuandu aprova, dekreta sai reitór ona.

“Maibé, imi agora halo de’it demonstrasaun, surat ida seidauk to’o ha’u ezonera reitór UNITAL ninian. Tenke ho razaun, tanba nia mós iha direitu atu halo auto-defeza, ida ne’e mak alin sira tenke hatene,” nia fó hanoin, no husu atu estudante sira hatama petisaun ho data determinadu, entre 11-19 maiu, agora.

Tinan-tinan univesidade nia problema mak osan, maibé sei iha dosente no profisionál sira ne’ebé kontinua manten tanba ida ne’e nia agradese dosente sira, problema biar mosu maibé la husik universidade ida ne’e.

“Reitór rezolve problema, ne’e akadémiku ninian, labele hanoin lai katak tuun ka sa’e. só hein fundasaun, kuandu estruturadu ona, fundasaun investe ona. OK. Entaun, ha’u-nia desizaun mak ida ne’e, universidade la’o normál nafatin. Ha’u rona katak reitór atu rezolve ona kona-ba osan. Universidade hakarak taka lakuna ne’ebé mak mamuk para universidade la’o ba oin nafatin,” nia dehan.

Lere mós apela ba akadémiku UNITAL sira atu kontinua hatudu maturidade. “Ha’u apela ba imi joven, ha’u-nia oan, beioan, preokupa imi-nia futuru ba! Imi dosente sira, hatudu imi-nia maturidade nu’udar akadémiku. Edukasaun importante, nasaun ne’ebé la iha edukasaun, la iha sivilizasaun. La iha sivilizasaun, nasaun bele riku oinsá, nasaun la la’o ba oin,” konklui prezidente FUNATIL, Lere Anan Timur.

Reitór UNITAL, Roberto Seixas Miranda, iha nia intervensaun, kona-ba ejizénsia estudante sira, nia insiste katak prontu atu husik kargu ida ne’e, tanba tempu to’o ona. Maibé, bazea ba pedidu prezidente FUNATIL mak nia sei eziste to’o ohin loron, sai nu’udar reitór.

“Ha’u agora duni, ha’u bele sai, oras ne’e dadauk, ha’u bele sai agora, mas ha’u hakarak universidade ne’e ba oin, durante ha’u aguenta iha ne’e, ha’u hatene imi mós susar, ha’u mós susar, ha’u mak ema seluk, ha’u sai tiha ona husi fatin ne’e,” hateten reitór.

“Ohin loron universidade ne’e akreditadu, departamentu barak akreditadu, tanba ne’e esforsu no elementu ne’ebé mak hamutuk ho ha’u, la’ós narnaran de’it. Dadaun ne’e, ba oin, problema saida de’it ha’u prontu rezolve problema, saida de’it. Problema ita nian mak ne’e fundadór sira funda, falta investidores, la investe,” nia garante.

Enkuantu, bainhira problema estudante hetan solusaun, bazea ba konkordánsia entre estudante sira ho prezidente FUNATIL, Lere Anan Timur, inklui reitória, reitór promote katak sei buka identifika erru ne’ebé mak akontese ona iha fakuldade sira, hodi bele rezolve no toma atensaun nomós kontrola dosente sira hotu.

Ba dosente sira ne’ebé durante tama aula no hanorin estudante sira hodi hala’o sira-nia dever, maibé seidauk simu sira-nia direitu, universidade hakarak selu.

“Dosente sira la fó aula ba estudante sira, tanba ne’e estudante sira halo manifestasaun. Katak, dosente sira ne’ebé mak la tama aula, labele selu sira-nia saláriu; dehan estudante sira. Maibé ohin rezolvidu ona. Atu selu ona agora, atu buat hotu la’o normál,” informa reitór Roberto Seixas Miranda.

Jornalista: Rafy Belo | Editór: Manuel Pinto

Imajen: Estudante UNITAL hato’o petisaun verbalmente. Foto TATOLI: Rafy Belo

Sem comentários: