DILI, (TATOLI) – Diretór
Jerál Ministériu Turizmu, José Dias Quintas, informa iha fulan neen de’it (husi
janeiru-juñu) tinan ne’e vizitante Ramelau hamutuk 31.235 kompara
ba 2017 ho totál 21.171.
“Signifikativu tebetebes iha
fulan neen de’it. Pergunta mak ne’e se kapasidade de karga liu ona nia limite
saida mak akontese, problema ambiente sei mosu, ne’ebé teknikamente ambiente
sei esplika kona-ba erozaun, kuandu ita lakontrola maka aban-bainrua rai iha
foho-tutun iha ita-nia Na’i-Feto nia ne’e sei monu tanba todan demais”, Quintas
tenik iha Sentru Konvesaun Dili bainhira hala’o sorumutuk ho liña ministériu no
igreja hodi ko’alia sobre proteje sítiu Na’i-Feto Ramelau, ohin.
Diretór ne’e dehan númeru husi
vizitór sira ne’e alista husi funsionáriu MT ne’ebé serbisu iha fatin ne’e.
“Sira tama iha ne’ebé rejista. Bazea ba dadus ami haree katak sa’e maka’as,
maibé problema mak oinsá mak ita rezolve liuliu ba asuntu ambientál nomós
impaktu sosiál”.
Ministru Turizmu, Manuel Vong,
kontente tanba númeru vizitante komesa barak liuliu bá ho inisitiva rasik ne’e
sinál ida di’ak tebes, maibé kestaun mak toma atensaun.
“Liuliu oinsá mak ita tau regra.
Sira ne’ebé mak bá ne’e ho númeru ne’ebé boot tebes ho fulan neen de’it
signifika númeru ne’e sei aumenta ba nafatin, agora kapasidade de karga ne’ebé
maka iha Ramelau ne’e mak ita presiza organiza didi’ak entre Ministériu Turizmu
ho dioseze, ita-nia autoridade lokál para bele limita ema, númeru hira mak bele
bá to’o Ramelau tutun. Sira bele bá Ramelau iha dadeer no kalan, mas tenke iha
sekuénsia grupu mak bele sa’e to’o bá leten”.
Nune’e presiza atu jere mak nia
impaktu negativu liuliu ba ambiente no sosiál ne’ebé iha efeitu pozitivu nomós
negativu.
Ramelau foho ida ne’ebé aas liu
iha Timor-Leste ho nia aas métru 2986 ne’ebé eziste iha munisípiu Ainaru, postu
administrativu Hatubuiliku iha suku Nonomoge ne’ebé hatuur ilas Na’i-Feto Timór
nia Liurai Feto.
Jornalista: Maria Auxiliadora | Editora:
Rita Almeida
Imajen: Ilas Na'i-Feto Ramelau.
Foto/Google.
Sem comentários:
Enviar um comentário