segunda-feira, 11 de junho de 2018

AIFAESA no AA Apreende Bebida Alkólika Iha Meimart

PARTILHAR

DILI, (TATOLI) - Autoridade Inspesaun no Fiskalizasaun ba Atividade Ekonómika no Sanitária (AIFAESA) hamutuk ho Autoridade Aduaneira (AA) liuhusi inspesaun konjuntu apreende bebida alkólika hamutuk 423 iha loja Meimart, Audian tanba deskonfia laliu husi Alfándega.

Koordenadór AIFAESA, Abílio Oliveira Sereno, hatete AIFAESA hetan kooperasaun di’ak hamutuk ho AA ne’e deskobre katak iha buat balun ne’ebé fa’an laliu husi Alfándega. Tuir kódigu penál bainhira merkadoria sira la ultrapasa husi AA ne’e konsidera hanesan krime hanaran kontra bandu.

“Tan hanesan ne’e maka sasán sira ne’ebé ami haree iha ne’e sei foti hotu tanba ne’e kontra bandu. Sasán sira ne’e ami sei rejista hotu hira mak ami lori no sei koordena ho Alfándega para entrega ba Alfándega tanba ne’e kompeténsia sira-nia, kuandu laliu ho normál Alfándega mak sei haree no foti asaun tuir regra ne’ebé vigora”, Abílio afirma ohin iha Loja Meimart, Audian bainhira halo inspesaun iha fatin ne’e.

Maski AIFAESA iha kompeténsia atu tama iha fatin sira hotu, maibé Alfándega mós iha regra rasik, nune’e sei respeita regra sira ne’e hodi koopera depois hamutuk hodi haree destinu bebida sira ne’ebé foti ne’e atu lori bá ne’ebé.

“Ohin ne’e ita haree mak tua sira ne’e, ami haree mós telemovel sira ne’ebé tuir Alfándega laliu husi ne’ebá. Kuandu laliu kontra bandu tenke foti tiha depois bainhira prova fali, sira lori evidénsia depois bele foti, maibé ida ne’e ami sei entrega ba Alfándega”.

Entantu iha tua ida ne’ebé hetan lisensa no halo produsaun iha rai-laran ne’ebé prodús husi Jinchaolin Wineindustry.Lda, maibé deskonfia laselu taxa iha AA no halo mós apreensaun ho tua importadu sira seluk ne’ebé uza marka Xina nian ne’ebé balun ho nia akóliku porsentu 16 no 38.

Diretór ba Intelijen no Anti Fraude, Deonísio da Cruz Perreira, realsa bainhira koa’lia sobre tua-manas ne’e iha parte Alfándega kona-ba buat ida naran konsumu seletivu signifika sasán ne’ebé selu taxa ida ne’ebé ho porsentu 5. Alinde ne’e kona mós excise katak bainhira tama mai iha parte ida selu taxa nomós cukai ne’ebé dehan kada litru ida dólar 8.50.

“Signifika kualkér nia mai tenke deklara, bainhira tua ne’ebé tama mai Alfádega haree kuandu ladeteta katak nia fa’an iha merkadu halo lukru maka’as, maibé sein kontribui taxa ba Estadu, tanba ne’e maka Alfándega komesa iha momentu ne’e bá oin sei halo inspesaun sériu”.

AA liuhusi mídia apela ba kualkér importadór sé de’it maka hatama sasán mai no sente katak laselu taxa di’ak liu halo deklarasaun mai Alfándega tanba hahú ohin sei halo inspesaun no halo kooperasaun ho instituisaun relevante sira.

“Ezemplu haree ba sigarru ami halo kooperasaun ho Ministériu Saúde no AIFAESA. Bainhira ami halo inspesaun ba merkadoria sira seluk maka iha ligasaun ho instituisaun seluk ami sei halo nafatin apreensaun bainhira laiha deklarasaun. Ezemplu ki’ikoan, ohin ita haree tua ida mai dehan prodús iha Timór, nia lisensa iha ne’e laiha problema mas antes nia distribui ba merkadu ne’e nia selu taxa ka la’e?”.

Tuir baze dadus AA nia katak distribuidór sira laselu taxa tanba husi sesaun intelijen no anti fraude inklui mós konformidade laiha prova ne’ebé hatudu katak sira selu. Nune’e koordena ona ho AIFAESA sobre sasán ne’e bainhira nia na’in mai prova katak nia selu duni taxa liuhusi regra normál sei halo fali auto entrega hodi fó filafali produtu ne’e, maibé laiha sei afavór ba Estadu.

Jerente Meimart, Lin Hao, dehan loja simu tua husi distribuidór sira hodi fa’an iha fatin ne’e, maibé kona-ba selu taxa ka la’e ladún hatene. “Ita horisehik husu sira fó lisensa produsaun tua nian no sira hatama fulan rua ona”.

Jornalista: Maria Auxiliadora | Editór: Manuel Pinto

Imajen: Bebida alkólika ne’ebé deskonfia laliu husi Alfándega. Foto/AIFAESA
PARTILHAR

Author: verified_user

Publicação luso-timorense sem fins lucrativos

0 comentários: