Fulan Ne’e Númeru Kompañia Foun Aumenta

DILI, (TATOLI) – Diretór Ezekutivu Servisu Rejistrasaun no Verifikasaun Emprezariál (SERVE), Florêncio Sanches, hatete semana dahuluk agostu 2018 gráfiku ba rejistrasaun kompañia foun sa’e.

“Iha dia 1 até 10 agostu ha’u foti relatóriu ema taka, loke no renova hira? Entaun dadus ne’e hatudu mai katak númeru ida foun ne’e agora aas, tanba sira hatene katak buat ne’ebé SERVE hatete sai ne’e to’o ba iha sira-nia tilun katak keta taka, loke nafatin, tanba polítika ne’e la’ós atu hamate setór privadu”, Florêncio dehan iha Matadouru, ohin.

Nia hatutan juñu liuba SERVE simu pedidu hosi kompañia 69 atu taka, maibé ho sira nian sujestaun atu taka de’it atividade la’ós kompañia, tanba ne’e númeru empeza ne’ebé rejistu aumenta.

“Ita tenke kria buat ida ne’ebé halo sira hakmatek, labele halo bee merak liután. Ne’ebé sira hatene katak impaktu ne’ebé agora iha ne’e impaktu ba polítiku nian, maibé ita mantein nafatin ita-nia situasaun hanesan ne’e ekonomia ki’ik ne’e bele la’o”.

Florêncio afirma empreza ki’ik sira hahú iha 2016 no 2017 kontribui saláriu ba funsionáriu SERVE husi taxa porsentu 10 ne’ebé sira selu.

“Ita-boot sira (empreza ki’ik) loloos orgullu, tanba ami-nia saláriu ba dahuluk iha 2016 no 2017 ida ne’e mai husi selu taxa, ne’ebé sira sente ema sei respeita ita no ami tenke respeita, tanba ida ne’ebé bolu selu taxa ne’e mak liurai”.

Florêncio haktuir númeru empreza hotu ne’ebé rejistadu to’o iha juñu 2018 hamutuk 22.950 resin.  Husi númeru ne’e SERVE konsege fó sertifikadu ba sira-nia atividade ne’e liu rihun 100.

“Husi rihun atus liu ne’e maka Governu koleta taxa porsentu 10. Husi rihun 22 ne’e porsentu 90 ema timoroan mak na’in ba kompañia, ema estranjeiru mak na’in ba kompañia rihun ida atus lima hanesan ne’e”.

Diretór Ezekutivu ne’e dehan Timor-Leste iha ona dekretu ida ne’ebé atu asesu ba finanseira, nune’e ekipa ki’ik husi Banku Sentrál halo ona aprosimasaun ho SERVE atu tuur hamutuk hodi kria kritériu ida ba maluk timoroan para bele asesu ba ida ne’e.

“Ne’ebé husu ba banku komersiál sira atu hamenus netik ita-boot sira-nia kritériu atu salva negosiante ki’ikoan sira, tanba mezmu 22 mil de’it sira mak agora halo atividade ekonómika iha rai-laran”.

Jornalista: Maria Auxiliadora | Editora: Rita Almeida

Foto/Google.