Povu Seidauk Asesu Bee Mos

DILI — Problema bee mos, Estrada no eletrisidade too oras nee nafatin sai preokupasaun ba komunidade sira iha baze, liu liu komunidade sira neebe hela iha area remotas.

Tuir Deputadu Alexandrino Cardozo, iha Suku Debus, Suku ida neebe eziste duni iha kapital Suai, postu Suai Vila, too agora komunidade sira seidauk asesu ba bee mos.

Problema ida seluk maka liga ho estrada husi, Fronteira Mota masin ba too postu Suai Vila no husi Fronteira ba too iha ponte Tafara uza alkatraun hotu ona, maibe husi aldeia fatu boa mai too busa kukun tali oan  seidauk. Tanba nee bainhira tempu bai loron komunidade sira neebe hela besik estrada ibun nee sai vitima tanba rai rahun. Nunee mos komunidade balu seidauk asesu ba eletrisidade. “Ita nia povu iha baze nafatin preokupa, tanba too agora sira sei hasoru hela problema, estrada, bee mos, no eletrisidade iha baze, tanba nee husu ba governu atu toma konsideirasaun,” informa Deputadu Alexandrino Cardozo liu husi sesaun plenaria, Tersa (15/01/2019) iha Parlamentu Nasional.

Iha fatin hanesan Deputadu agostinho Somotxo dehan  ukun durante tinan sanu resin ona, maibe problema barak maka povu kontinua hasoru iha baze. “Ita haree problema kiik hanesan bee mos iha Dili laran deit mos too oras nee seidauk rezolve, no aat liu tan povu sira neebe hela iha area remotas barak maka seidauk asesu ba bee mos, Estrada no eletrisidade,”informa nia. 

Madalena Horta | Suara Timor Lorosae