DILI, (TATOLI) - Xefe Estadu
Maior FALINTIL-Forsa Defeza Timor-Leste (F-FDTL), Majór Jenerál Lere Anan
Timur, husu atu la bele kondena no fó sala uluk Polisia iha atuasaun
ne’ebé polisia halo hasoru manifestante vendedór ambulante ho Movimentu Sosiál
Timor-Leste.
Hafoin konferénsia imprensa iha
Largo Lecidere, horiseik, massa husi Movimentu Sosiál Timor-Leste hamutuk ho
vendedór ambulante sira halo marsa ba pás mai to’o iha resintu Parlamentu
Nasional atu entrega petisaun ba ninia reprezentante sira iha Uma
Fukun PN, maibé intensaun ida ne’e lakonsege tanba polisia uza forsa hodi tiru
gas lakrimojéniu obriga hapara sira nia asaun.
Intensaun husi manifestasaun no
asaun dame ne’e atu espresa sira nia lamentasaun ba Rezolusaun Autoridade
Munisípiu Dili kona-ba implementasaun polítika eviksaun hasoru vendedór
ambulante sira. ironia, vendedór ambulante sira nia protestu ida ne’e
responde kedas ho aksaun brutalidade husi polisia hodi rezulta vendador
nain ida kanek iha ulun no seluk monu dezmaia tanba la aguenta ho gas
lakrimojéniu.
Major Jenerál Lere Anan Timur
hateten, seidauk to’o konkluzaun tanba prosesu investigasaun seidauk hahú.
Tanba ne’e, la bele fó sala uluk polisia.
“La’o maka ita haree to’ok.
Katak, se polísia tiru ne’e iha nesesidade atu tiru ka laiha nesesidade atu
tiru”, hateten Lere Anan Timur, ohin, ba jornalista sira iha
Palásiu Prezidente Nicolau Lobato, Bairru Pité, relasiona ho atuasaun polísia
tiru gás lakrimojéniu ba vendedór ambulante sira bainhira sira mai hato’o
petisaun ba Parlamentu Nasionál.
Lere deskorda bainhira dehan,
polísia baku no tiru ema ne’e mesak sala hotu de’it, tanba polísia dala barak
hatudu sira nia profisionidade iha atuasaun problema.
“Ita kondena polísia la
profisionál ne’e sala. Profisionál ne’e maka sira eziste to’o agora ne’e”,
hateten Lere Anan Timur.
Nia husu ba Parlamentu Nasionál
no Komandu Polísia Nasionál Timor-Leste (PNTL) atu halo investigasaun kle’an ba
kazu ne’e para bele hatene sé maka sala. Aleinde ne’e, Lere apela ba komunidade
no joven sira atu koopera ho parte seguransa para kria estabilidade hodi loke
dalan ba dezenvolvimentu.
“Ita hotu timoroan no ita
hotuhotu hakarak dezenvolvimentu. Tanba ne’e, ita presiza koopera malu atu kria
estabilidade”, afirma Lere Anan Timur.
Jornalista: Xisto Freitas | Editór:
Francisco Simões
Imajen: Iha Facebook
Sem comentários:
Enviar um comentário