Hosi António Sampaio
Iha estrada sira ne'ebé nakonu
iha Jakarta, ne'ebé tránzitu aumenta maka'as iha époka sira udan nian,
prolifera kapasete verde sira hosi mota sira transporte nian, ne'ebé la'o
hamutuk ho kartaz multikoloridu sira no bandeira sira hosi eleisaun nasional sira
iha loron 17 Abril.
Hanesan iha tinan lima liubá, oin
dominante sira iha póster sira kampaña nian maka kandidatu prezidensial
prinsipal na'in rua: ida hosi parte atual xefe Estadu, Joko Widodo, Prezidente
dalima dezde ditador antigu Suharto tuun, no ida seluk maka eis-jeneral hosi
Forsa Espesial sira no eis-mane-foun Suharto nian, Prabowo Subianto.
Sondajen sira hatudu vantajen
oituan ba Joko Widodo, iha kampaña ida ne'ebé kahur buat hotu, dezde ekonomia
to'o edukasaun, ba debate hosi sekularizmu "kontra" konservadorizmu
ka to'o mudansa klimátiku sira no polítika esterna.
To'o ko'alia ona kona-ba
Timor-Leste, hosi pasajen, iha debate prezidensial ida, ho Prabowo refere ba
referendu ne'ebé halo iha tinan 20 liubá - maski nia pasadu hanesan militar iha
Kopassus, Forsa Espesial sira indonéziu nian, ignoradu tebes.
Dimensaun hosi prosesu eleitoral
haree di'ak tebes hosi númeru sira: eleitor hamutuk millaun 192 no entre sira
millaun 70, entre tinan 16 to'o 20, sei vota ba dala uluk.
Aleinde Prezidente ho
visi-Prezidente, eleitor sira hili membru na'in 711 hosi kámara rua hosi
Asembleia Konsultivu Popular (MPR), na'in 575 iha Konsellu Reprezentantivu
Popular (DPR) no na'in 136 iha Konsellu Reprezentantivu Rejional (DPD).
Iha jogu sei halo parte mós fatin
hamutuk 19.500 resin iha distritu eleitoral lejislativu sira hamutuk 2.000
resin iha nível rejional, munisipal ho lokal. Iha partidu konkorente hamutuk
16, entre sira partidu foun haat.
Widodo, ho tinan 57, hili ba nia
"númeru daruak" Ma'ruf Amin - intelektual ida no polítiku islámiku,
líder hosi Majelis Ulama Indonesia, estrutura prinsipal klerikal musulmanu iha
nasaun, ne'ebé harii iha Orden Foun hosi Suharto.
Dupla hosi atual xefe Estadu nian
hetan apoiu hosi partidu sira, entre sira maka PDI-P hosi eis-Prezidente
Megawati Sukarnoputri, Golkar (Suharto nia partidu) ho PKB, hosi eis-Prezidente
Wahid nian: entre sira reprezenta, agora daudaun, 60% hosi fatin sira iha
parlamentu atual no 62% hosi votu sira iha eleisaun sira ikus ne'e.
Iha parte seluk, Prabowo nia
númeru rua maka Sandiaga Uno, atual visi-governador Jakarta nian ne'ebé, antes
tama iha mundu polítiku, hanesan emprezáriu ho perfil destakadu, ho dupla
ne'ebé apoiadu hosi partidu oioin ho dimensaun ki'ik ne'ebé, entre sira,
reprezenta 40% hosi fatin sira iha parlamentu no 36% hosi votu sira iha
eleisaun 2014 nian.
Ne'e hanesan tentativa ba dala
tolu hosi Prabowo hodi to'o iha Palásiu Prezidensial, nia ne'ebé sai ona
hanesan númeru daruak iha kampaña tinan 2009 no rival Jokowi nian iha tinan
2014, iha tempu ne'ebá konsege ona votu hamutuk 46, 85% kontra votu 53,15%
ne'ebé maka hetan hosi atual Prezidente.
Iha sidade boot ne'ebé kontinua
aumenta ho ritmu maka'as tebes - zona urbana Jakarta nian simu habitante
millaun 30 - kartaz sira kampaña nian hatudu opsaun sira: foto sira hosi kandidatu
no, iha kazu balun, kuadradu ida hosi boletin votu nian ho imajen hosi pregu
besi nian ne'ebé, ho parajen sira ne'e, hodi bele hala'o direitu votu nian.
Iha loron-loron sidade nian,
motorista sira hosi mota GoJek no Grab, empreza sira transporte nian ne'ebé
maka ema indonéziu barak hetan nia rendimentu, la'o entre karreta sira nia
leet, ho pasajeiru sira tuur iha kotuk, hodi tenta hetan tempu iha perkursu
ne'ebé neineik.
"Ha'u uza ne'e hodi hetan
tan osan balun. Presiza tanba buat hotu karun tebes. Maibé iha kliente
barak", konta hosi Dewi, motorista ida hosi Go-Jek, ho kapasete tau iha
hijab metan nia leten, símbolu ida ne'ebé bele haree liu hosi aumentu
konservadorizmu iha Indonézia.
Goenwan Mohamad, ohin loron
hanesan eskritor ho pintor, maibé uluk hanesan jornalista ho fundador hosi
revista Tempo - revista dahuluk ida ne'ebé iha tinan 90 hosi sékulu liubá
dezafia ona Orden Foun hosi Suharto -, hatete katak aumentu hosi uzu hijab
hatudu "lakon ida hosi liberdade espresaun fíziku" nian.
"Ema sira hanoin katak
relijiaun bele halo furak klamar, halo ó sai ladún koruptu. Maibé iha prátika
ne'e la akontese. Saida maka bele haree, no hanesan vízivel tebes, hanesan
ezemplu iha forma oinsá ema sira hatais, hanesan autokontrolu ida iha espresaun
fíziku sira", nia hatete ba Lusa.
"Iha tinan 25 liubá kuaze
laiha ema ida maka uza hijab. Liberdade hosi espresaun fíziku agora hanesan
limitadu tebes", nia konta ba Lusa.
Iha parte seluk, aumentu hosi
kapasete verde sira hosi ema sira ne'ebé oferese transporte iha Indonézia - no
hamutuk ho revolusaun hosi serbisu sira 'online', hosi kuaze buat hotu, ne'ebé
kontinua aumenta ritmu maka'as iha sudeste aziátiku - hanesan sinal ida hosi
emprendedorizmu iha nasaun.
Maibé, maski ekonomia indonéziu
aumenta nafatin - la'ós 7% hosi promesa ne'ebé Joko Widodo halo - no bele haree
sinal sira hosi klase média ne'ebé metin, falta akordu mantén iha sosiedade ho
ema barak maka moris iha kondisaun sira hosi inseguransa ekonómiku total.
Tanba ne'e, iha ajenda hosi
debate eleitoral sira mosu kestaun sira hanesan dezenvolvimentu ekonómiku
nasional, kapasitasaun hosi mão-obra ka to'o problema global sira hanesan
mudansa klimátiku sira, maski iha kotu bele haree, tuir esplika ba Lusa hosi
diretor Australia Indonesia Centre nian, Kevin Evans, debate ida entre vizaun
sekular ida ho pluralista nasaun nian iha parte ida no iha parte seluk iha
konservadorizmu relijiozu no moral ne'ebé boot.
"Divizaun polítika sira iha
ne'e la bazeia iha klase, afiliasaun polítika la desidi hosi rendimentu
"tuir kapita". Defini nafatin entre sira ne'ebé maka kaer metin ba
vizaun ida hosi sosiedade ida ne'ebé pluralista no igualitáriu liu
"kontra" sira ne'ebé hakarak papel boot ida hosi relijiaun, iha kazu
Islaun nian, divizaun ida hanesan ho ida ne'ebé ita bele haree iha Índia ka iha
Israel", nia hatete.
Maski nune'e, Evans hatete senti
otimista, hodi afirma katak sinal sira hosi aumentu ba konservadorimu dura iha
tinan 30 nia laran no hahú mosu, to'o, sinal hosi "ajitasaun boot no
mobilizasaun hosi sira ne'ebé defende valor tradisional sira hosi pluralizmu".
Relijiaun prezente nafatin, ho
Jokowi hatudu hanesan pluralista liu, maibé hafoin hili ba "númeru
daruak" líder islámiku prinsipal ida iha nasaun, no Prabowo hahú hanoin
fali katak nia inan hanesan kristaun, maibé depois konvoka orasaun koletivu ida
iha meskita tomak iha nasaun laran iha loron-domingu oinmai, iha dadeer.
Kandidatu prezidensial sira, iha
loron hirak tuirmai, sei halo kampaña iha fatin oioin iha nasaun, fila ba
Jakarta iha parte final, antes loron rua reflesaun nian no votu nian.
Lusa | hia Sapo TL
Sem comentários:
Enviar um comentário