quinta-feira, 4 de abril de 2019

Tribunal timoroan konsidera ilegal ba kontratu sira ba obra sira iha edifísiu hosi Komisaun Funsaun Públika

PARTILHAR

Kámara Konta timoroan nian konsidera hanesan ilegal, prejudika ba interese Estadu nian no iha benefísiu ba empreza rua hosi kontratu ne'ebé asina ba dezeñu, supervizaun ho kontrusaun hosi edifísiu foun hosi Komisaun Funsaun Públika nian iha Díli.

Iha relatóriu hosi auditoria ba projetu ne'ebé divulga iha loron-tersa katak kontratu ba dezeñu no supervizaun "la salvaguarda interese sira Estadu nian, liuliu finanseiru, maibé hamosu benefísiu ida ba Pires Architects", empreza hosi atual ministru Obra Públika, Salvador Pires.

Obra - ne'ebé hetan beibeik atrazu no problema tékniku sira ne'ebé maka'as - konsede hodi la salvaguarda interese sira hosi Estadu ba empreza Timor Lorosae Independent Co. (TLIC), hanesan empreza ne'ebé aat liu hosi empreza lima ne'ebé klasifikadu iha konkursu públiku, refere iha relatóriu.

Iha kauza maka "prosedimentu sira hosi aprovizionamentu ho ezekusaun" hosi kontratu sira ba obra sira ho folin dolar millaun 3,45 resin (euro millaun tolu) ho TLIC no hosi dezeñu no supervizaun iha folin dolar rihun 758 resin ho Pires Architects.

Pires Architects harii de'it iha fulan-Abril tinan 2009, fulan ida antes asina kontratu sira. Salvador Pires uluk hanesan arkitetu prinsipal no xefe hosi ekipa no iha de'it obra hosi jardin infánsia ida no proposta ida ne'ebé aprezenta ba Governu ba Biblioteka Nasional maka halo parte de'it iha nia kadernu projetu sira nian.

Kámara Konta (CdC) fó sai ona iha loron-tersa relatóriu hosi auditoria na konformidade ba faze dahuluk hosi projetu konstrusaun edifísiu Komisaun Funsaun Públika (CFP) nian ne'ebé nia obra hetan beibeik parajen sira entre tinan 2010 ho tinan 2014.

Iha relatóriu hatudu katak obra ne'e konsede ona ba empreza ne'ebé hetan klasifikasaun aat liu entre empreza lima ne'ebé maka aprezenta ona proposta tékniku sira, no sai hanesan empreza ida entre empreza tolu ne'ebé maka la halo parte tanba la hetan avaliasaun mínimu hosi pontu 70, hetan de'it pontu 15.9.

"Konsede kontratu ba TLIC halo la tuir lei. Empreza la halo parte iha avaliasaun hosi proposta tékniku sira tanba la hetan avaliasaun mínimu hosi pontu 70, nune'e, tuir loloos, labele hetan konsiderasaun", hatutan.

"Hasoru asaun sira ne'ebé haktuir iha leten, tenki konklui katak bainhira konfere kontratu ba TLIC hodi harii edifísiu foun CFP nian hanesan ilegal (...), no desizaun ne'e foti hodi bele fó benefísiu ba TLIC hodi fó prejuízu ba konkorente haat seluk", hakerek iha testu ne'e.

Iha dokumentu hatudu katak "TLIC laiha esperiénsia, laiha solidez komersial ida, no laiha kapasidade ezekusaun ho finanseiru ne'ebé presiza hodi hala'o obra ida ho dimensaun boot" hosi projetu ne'e, asaun ne'ebé hanesan koñesidu bainhira halo konkursu ne'e.

"Forma oinsá konstrusaun ne'e mosu no problema sira ne'ebé rejista bainhira hahú, iha fulan-Novembru 2010, to'o nia parajen iha tinan 2014 nia rohan, akontese tanba desizaun ne'ebé foti iha tinan 2010", subliña.

Esplikasaun sira ne'ebé fó ba CdC iha ámbitu hosi auditoria hosi primeiru-ministru iha momentu ne'ebá, Xanana Gusmão, "la muda faktu ho konkluzaun sira ne'ebé hato'o ona, konstitui, liuliu, iha tentativa ida justifikasaun nian antes ba desizaun ida [konfere kontratu ba TLIC] ne'ebé halo la tuir lei", refere hosi dokumentu ne'ebé iha pájina hamutuk 241.

Relatóriu konsidera, "lahó dúvida ida" iha "desproporsaun signifikativu ida entre saida maka selu ona ba TLIC, saida maka konsidera realizadu ona" hosi Pires Architects no hosi Governu "no asaun ne'ebé maka halo duni ona".

CdC konsidera hanesan "ilegal" kontratu sira ne'ebé asina ho Pires Architects, tanba viola prinsípiu prinsipal oioin hosi aprovizionamentu públiku, inklui legalidade no obediénsia ba norma legal sira, igualdade, konkorénsia, publisidade ho transparénsia, kontinuasaun hosi interese públiku no imparsialidade.

Iha relatóriu afirma katak "la hatene esperiénsia anterior ruma hosi empreza no hosi ekipa supervizaun nian (...) iha serbisu sira fiskalizasaun hosi serbisu sira".

Aleinde kontratu prinsipal sira, relatóriu haree mós parte seluk sira hodi kestiona validade hosi nia asinatura, tanba kontratu dahuluk sira haree ba rejimi "lump sum", ka pagamentu úniku, no "iha ona folin ne'ebé konsidera hanesan aas tebes" hasoru folin hosi projetu nian.

"Ho asinatura hosi adisional dahuluk kontratu nian, totaliza liu ona folin hosi dolar rihun 585, koresponde ba persentajen ida hosi folin obra nian ne'ebé la hanesan ho ida ne'ebé maka koñese iha Timor-Leste (19,2%)", hatutan.

Iha relatóriu hakerek katak Estadu falla ona durante ezekusaun obra nian, tanba, "maski inkapasidade ne'ebé hatudu hosi TLIC hodi halo obra ne'ebé bele haree bainhira hahú knaar", CFP (obra nia na'in) no entidade sira ne'ebé tuir loloos halo supervizaun ba obra, "hahú aumenta nafatin prazu ba nia konkluzaun, la obriga empreza hodi kumpri nia obrigasaun kontratual sira no hala'o obra".

"Inkapasidade hosi empreza hodi hala'o obra tuir loloos lori ba Estadu, iha tempu loloos, hodi prosede ba aplikasaun kastigu sira hasoru empreza ka, ho dalan simples, efetiva rezolusaun hosi kontratu", refere.

Parte hosi ilegalidade sira ne'ebé halo la'ós hanesan "suscetivel hosi eventual responsabilidade finanseiru kastigu nian tanba faktu sira akontese antes hahú hala'o Lei Orgániku hosi Kámara Konta nian", hatutan.

Maski nune'e, inklui iha relatóriu mapa ida hosi "infrasaun finanseiru sira ho apuramentu hosi responsabilidade sira", hanesan sansionatóriu no mós reintegratóriu sira tanba "pagamentu ilegal sira no pagamentu sira indevido".

Iha konkretu, maka kontratu sira hosi dezeñu no supervizaun iha folin dolar rihun 30 no dolar rihun 208,5, ho responsabilidade monu ba prezidente CFP iha momentu ne'ebá, Libório Pereira.

Problema ida ne'ebé todan liu maka falta impermeabilizasaun hosi parede sira hosi kave ne'ebé destina ba arkivu sira hosi CFP, problema ida ne'ebé nia solusaun demora tinan rua ho ezekusaun ida ne'ebé ladi'ak no ne'ebé "la garanti efikaz impermeabilizasaun hosi kobertura ne'ebé tau hamutuk ho kobertura nia rahun maka'as ne'ebé halo bee tama liuhosi kuak sira ne'e", hakerek iha dokumentu.

Lusa | iha Sapo TL
PARTILHAR

Author: verified_user

Publicação luso-timorense sem fins lucrativos

0 comentários: