quinta-feira, 23 de maio de 2019

“Ema Ho Defisiénsia Mós Bele”

PARTILHAR

DILI, 23 maiu 2019 (TATOLI) - Asosiasaun Defisiénsia Timor-Leste (ADTL) hamutuk ho Komité Para olímpiku Nasionál Timor-Leste (CPNTL-sigla inglés) realiza atividade desportiva hanesan tenis, hiit besi, tenis meza, badminton, dama ho basketeból no mós halo ezibisaun kultura ba ema ho defisiénsia hodi promove inkluzaun sosiál no komunidade sustentável. Atividade sira ne’e realiza hodi komemora mós loron restaurasaun independénsia ba da-17, ne’ebé komemora iha loron 20 maiu, kada tinan.

“Liuhusi oportunidade ida ne’e atu hatudu talentu ema ho kondisaun defisiénsia mós bele iha área desportu nian no ho perspetiva ida atu halakon públiku nia julgamentu ba ema defisiente sira katak defisiente sira iha uma atu hetan de’it apoiu. Maibé, sira mós iha oportunidade hanesan ho ema seluk no iha kapasidade atu kontribui ba nasaun,” hateten Diretór ADTL, Cesario da Silva, iha salaun Gináziu, GMT (Gedung Matahari Terbit), kinta (23/05).

Ezekutivu ne’e hateten tan katak eventu ne’e alende komemora loron restaurasaun maibé mós hodi promove saúde di’ak ba ema ho defisiénsia tanba konsidera katak liuhusi desportu bele fó saúde di’ak ema ho kondisaun defisiénsia.

“Entaun liuhusi jogu ki’ik sira ne’e bele motiva ema defisiénsia hodi nune’e sira mós bele sai motivadór no inspiradór iha sosiedade sira-nia leet,” konsidera diretór Cesario da Silva perante profisionál komunikasaun sosiál sira.

Diretór ne’e mós hateten, mobilizasaun ba ema ho defisiénsia ne’e ki’ik tanba konsentra de’it Dili no modalidade sira iha kompetisaun ne’e neen de’it. “Ohin ne’e opening (abertura) maibé sei iha atividade barak liután iha closing (taka) ne’e sei integra mós programa kalan kultura, ezibisaun kultura husi ema defisiensia no ne’e sei sai bo’ot liu tan,” informa diretór.

Iha biban ne’e, ezekutivu ne’e informa katak iha futuru sira sei dezenvolve atividade idéntika beibeik no envolve mós defisiente sira husi munisípiu. Nia sujere mós, atividade sira hanesan labele husik organizasaun ba ema ho defisiénsia de’it mak organiza maibé hakarak governu mós organiza tanba konsidera katak kada tinan governu aloka osan hodi organiza eventu sira iha munisípiu maibé esklui tiha ema ho defisiénsia sira.

“Tanba ne’e, ho programa hanesan ne’e hodi enkoraja governante sira hodi haree no inklui mós defisiente sira iha selebrasaun no kompetisaun loron boot sira Timor-Leste nian,” Diretór Cesario da Silva fó hanoin.

Enkuantu, Vise-prezidente CPNTL, Mateus Lucas konsidera defisiente sira mós iha boa vontade hodi prienxe dezenvolvimentu Timor-Leste no liuhusi atividade desportu buka mós fini foun nune’e prepara ba futuru, iha eventu rai laran no mós rai li’ur. “Dala barak ema dehan defisiénsia la halo buat ida maibé iha realidade ema defisiénsia sempre halo buat ne’ebé di’ak ba nasaun ne’e”.

Nia mós enkoraja juventude hanesan mós defisiénsia sira atu hatudu disiplina, respeitu no unidade tanba importante liu hanesan bukae ida atu susesu ba oin.

Entretantu, atividade desportiva no ezibisaun kulturál ne’e hahú ohin no sei ramata aban, lorokra’ik. Atividade ne’e abertura direta husi Vise-prezidente CPNTL, Mateus Lucas no mós Prezidente CDTL, Afranio Xavier Amaral.

Jornalista: Nelia Rosário | Editór: Rafy Belo

Imajen: Diretór Ezekutivu ADTL, Cesario da Silva. Foto FB: Dize Cesário Adhabel
PARTILHAR

Author: verified_user

Publicação luso-timorense sem fins lucrativos

0 comentários: