Agustu 2019, Governu Entrega Uma 8 Ba Veteranu Reformadu

DILI, 23 maiu 2019 (TATOLI) - Tuir planu, iha agustu 2019, Eis Ministru Planeamentu Investimentu Estratéjiku (MPIE), Kay Rala Xanana Gusmão ho membru governu sira sei oferta uma ualu (8) ne’ebé harii ona ba veteranu ne’ebé luta durante tinan 24 hamutuk na’in ualu (8) ne’ebé reforma ona hosi instituisaun FALINTIL-Forsa Defeza Timor-Leste (F-FDTL).

Diretór Ajensia Dezenvolvimentu Nasional (ADN), Samuel Marçal dehan, uma ualu ne’e eis Ministru MPIE Xanana haruka harii liuhosi kooperasaun serbisu ho Komandu F-FDTL no Ministériu Defeza hodi oferta ba vereranu sira ne’e.

Projetu ne’e hahú konstrui iha 2017 maibé la’o tarde tanba impase polítika tinan rua afeta ba konstrusaun. Oras ne’e, Samuel haktuir, kontrusaun fíziku uma ne’e atinje ona pursentu 90 ne’ebé implementa hosi kompañia Da Vincy Unipesoal, Lda ho totál orsamentu $965.262.08.

 “Ha’u bele dehan kontrusaun %90 ona. Agora, ita sei prepara ninia ekipamentu sira hanesan kama, armari, meza no fasilidade sira seluk. Falta de’it monta paving no dada bee-moos ba uma hotu ona para fulan oin bele entrega ona,” dehan Diretór ADN, Samuel Marçal, ba Agência Tatoli iha nia kna’ar fatin, Fatuhada, Dili, ohin.

Nia hatutan, iha uma ne’e nia laran fiksa ho ventilasaun iha odamatan no janela leten, tanba ventilasaun sei halo uma laran moris iha ambiente ida ne’ebé saudável ba família ne’ebé atu hela iha uma ne’e bele konente.

Nia dehan, veteranu kontinua sai hanesan entidade ne’ebé hetan atensaun espesiál hosi Governu hodi rekoñese sira nia luta liuhusi uma ne’ebé harii.

“Ita nia maun veteranu sira ne’e reforma ona hosi militár, maibé Estadu rekoñese nafatin sira atu hela iha fatin dignu,” Samuel haklaken.

Nia haktuir, uma ualu ne’e harii iha Munisípiu Lautém nu’udar faze inísiu no ba oin la taka dalan sei harii tan uma iha fatin seluk depende ba polítika governu.

“ADN he’in de’it se governu fó rekomendasaun mai dehan atu halo tan uma iha fatin seluk, ami prontu kontribui. Ne’e depende ba governu nian desizaun,” Samuel tenik.

Iha fatin ketak, Veteranu Afonso Cabral “Mate Mak Foti” hosi Munisípiu Lautém ne’ebé foin reforma hosi F-FDTL dehan, nia agradese ho uma ne’ebé governu harii ba sira.

“Agradese governu harii ona uma ne’e iha kampu 745 Lospalos nia kotuk, maibé ami seidauk hatene bainhira maka governu entrega,” nia hateten.

Nia husu se bele governu labele harii de’it uma ualu ne’e, maibé fó atensaun espesiál ba veteranu sira seluk atu hetan oportunidade ho uma ne’ebé dignu hodi rekoñese sira nia luta.

Enkuantu, Vise Prezidente Konsellu Kombatente Nasionál Rejiaun I, Ponta Leste, Júlio M. de Jesus Canto haklaken, uma ne’ebé governu harii di’ak ona, maibé tuir loloos tenki kompleta ho kintál hodi fó fatin ba veteranu sira ne’e atu kuda netik hahán ruma.

Maski nune’e, Júlio lori veteranu Luatém nia naran hato’o agradese ba governu hodi konstrui ona uma ne’e ho di’ak.

Jornalista: Eugénio Pereira | Editór: Xisto Freitas

Imajen: Uma ualu ne’ebé governu harii ona ba veteranu rezisténsia na’in ualu iha Munisípiu Lautém antinji ona pursentu 90. Imajen: ADN