Empréstimu komersial sira ba área
privadu iha Timor-Leste tuun 2% iha tinan liubá, hafoin aumentu ida
"ne'ebé nunka akontese" hosi 25% iha tinan 2017, karik tanba liña
sira kréditu nian tanba atrazu hosi selu hosi Estadu, haktuir hosi Banku Mundial.
Relatóriu ekonómiku hosi Banku
Mundial, publika iha loron-tersa, haree katak nível sira kréditu nian
"aumenta beibeik durante tinan 2017, maibé tuun maka'as iha trimestre
dahuluk tinan 2018 nian".
Komportamentu ida ne'ebé, tuir
instituisaun, hamosu iha 2017 "resposta ida ba atrazu iha pagamentu ne'ebé
afeta área ekonómiku dependente hosi kontratu sira governu nian (hanesan
konstrusaun)".
"Diminuisaun maka'as"
hosi inísiu 2018 "bele akontese tanba aumentu hosi preokupasaun ho
kapasidade hosi kredor sira hodi selu tusan sira", refere relatóriu, hodi
haree katak iha termu jeral sira empréstimu individual sira maka impulsiona
aumentu hosi kréditu iha tinan 2018, bainhira konstrusaun ho turizmu rejista diminuisaun
iha nível sira kréditu nian.
Iha konkretu, relatóriu refere ba
empréstimu privadu individual sira reprezenta 41% hosi total kréditu bankáriu
komersial iha 2018, tuir konstrusaun (25%) ho komérsiu no finansa (19%).
Banku Mundial haree katak asesu ba
kréditu "relata beibeik hanesan restrisaun komersial importante ida,
ne'ebé bele la fó korajen ba dezenvolvimentu" hosi área oioin, agora
daudaun prepara hela hosi Banku Sentral sistema ida "garantia kréditu nian
hodi estimula empreza ki'ik sira ho empreza médiu sira, ho partilla hosi risku
kréditu nian".
Informasaun sira ne'ebé fó sai
ohin hatudu katak iha nafatin nível ki'ik sira hosi inkumprimentu, ne'ebé iha
Marsu 2018 iha 4% - dook hosi nível 42% iha 2010 - maski iha aumentu foun ba 6%
iha final tinan liubá.
Aumentu ida ne'ebé, tuir Banku
Mundial, akontese karik "tanba kondisaun sira ne'ebé ladi'ak, ne'ebé
empreza sira no mós indivídiu sira luta ho fluksu sira hosi kaixa" ki'ik
tanba atrazu hosi pagamentu sira.
Iha nível global, área bankáriu
kontinua karakteriza ho likidez ne'ebé aas - ho rásiu ki'ik ida hosi empréstimu
sira ba depózitu hosi 0,22 - tanba "intermediasaun finanseiru
defisiente" ho "parte barak hosi ativu sira hosi área bankáriu tau
iha exterior".
Taxa sira juru nian kontinua
hanesan aas, rejista média ida hosi 13% iha 2018 - bainhira juru sira hosi
depózitu iha média ki'ik liu hosi 1%.
Iha ámbitu seluk, situasaun
ekonómiku internu halo diminuisaun ida hosi défise komersial iha tinan liubá,
ne'ebé haleu entre dolar millaun 940, menus 2% duké 2017.
Importasaun hosi merkadoria sira
tuun 3%, liuliu tanba diminuisaun iha veíkulu sira no mákina sira, ho
importasaun hosi sasán konsumu nian no kapital nian haleu millaun 613 no hosi
serbisu sira tau hamutuk besik millaun 450.
Maioria hosi importasaun
merkadoria sira hanesan mai hosi nasaun membru sira ASEAN nian hanesan
Indonézia ho Singapura maibé mós hosi Xina.
Esportasaun hosi merkadoria sira
aumenta ona kuaze 50%, ba dolar millaun 25, tanba kafé - ne'ebé iha kolleita
di'ak liu duké iha 2017 - no ne'ebé reprezenta besik 95% hosi produtu tomak
ne'ebé esportadu.
Lusa | SAPO TL
Sem comentários:
Enviar um comentário