Projetu Pelican Paradise, PM Husu Empreza Labele Hein Komunidade Mamuk

DILI, 23 maiu 2019 (TATOLI) – Projetu Pelican Paradise ne’ebé to’o agora paradu kuaze tinan 10 nia laran, agora iha hela faze negosiasaun ho governu, maibé empreza ne’e hein hela atu halo akordu ho governu.

Primeiru-Ministru (PM), Taur Matan Ruak admite empreza ne’e hato’o duni proposta, maibé Xefe Governu husu halo lai buat ruma hodi governu haree no labele hein to’o komunidade sira husik fatin mamuk mak halo obra.

“Klaru nia haruka ninia proposta hodi governu haree no ami husu halo lai buat ruma para ami haree tanba nia labele hanoin ita ninia populasaun iha Tasi Tolu ne’e sai hotu mak nia halo, entaun ida ne’e lori tempu ba ita tanba labele duni populasaun sein arranja kondisaun ba sira,” tenik Xefe Governu, Taur Matan Ruak hodi hatán pergunta jornalista iha Palásiu Prezidente Nicolau Lobato, Bairru Pité, Dili, kinta ne’e.

Tuir Xefe Governu bainhira atu hahú obra ida presiza fazeadamente tanba tenke haree ba parte hotu. “Sei bele nia halo iha rai ne’ebé mamuk, ita nia mehi bele boot mas ita nia hakat neineik, agora ita nia mehi boot mas ita hakarak hakat boot dala ida entaun tinan 20 tan nia sei la halo”, katak.

Hodi dehan tan: “Kompañia ida ne’e horibainhira ha’u hateten ba nia dehan bainhira mak nia baruk atu para obra ne’e, tanba uluk ha’u sei jenerál nia ko’alia ona, agora tinan 10 resin ona nia ko’alia nafatin”.

Antes ne’e, Ministru Estadu Prezidénsia Konsellu-Ministru no Ministru Koordenadór Asuntu Ekonómiku en ezersísiu, Hermenegildo Augusto Cabral Pereira, bolu responsável Pelican Paradise Group, Lda, hodi ko’alia kona-ba akordu espesiál investimentu.

Proposta akordu espesiál investimentu ne’e ikus mai sei lori ba Konsellu-Ministru hodi ezekutivu sira bele halo analiza no fó apresiasaun.

Pelican Parasise sei halo dezenvolvimentu turístiku ho investimentu hamutuk miliaun $700.

Área dezenvolvimentu turístiku ne’e tuir planu sei harii iha rai hektare 558, iha zona entre Tasi Tolu no Tibar, ne’ebé sei inklui unidade otelaria, kampu golf, lote rezidensiál, sentru dezenvolvimentu ba joven sira, eskola internasionál ida, ospitál ida no sentru komersiál.

Dezenvolvimentu ne’e sei permite kriasaun kampu traballu ba ema 1500 iha faze konstrusaun no 1300 kampu traballu permanente hafoin konstrusaun no reflorestasaun projetu atinje ona porsentu 80.

Antes ne’e, iha loron 13 marsu 2019, responsável Pelican Paradise Group, Lda sira halo ona aprezentasaun iha Konsellu-Ministru maibé governu sei estuda kle’an hodi haree, hafoin hakat ba prosesu tuir mai.

Proposta investimentu kompañia internasionál husi Malázia ne’e, hahú ona iha tinan 2008, iha V Governu Konstitusionál.

Nune’e, governu hasai rezolusaun governu nú.33/2015 5 outubru no aprova hodi hahú konstrusaun.

Kontratu Pelican Paradise ho governu iha inisiál ba tinan 50 no posibilidade sei renova ba tinan 50.

Nune’e mós Pelican Paradise sei sai mother company ba kompañia hamutuk 20 husi nasaun Singapura no Malázia, ne’ebé sei hamutuk halo projetu boot ne’e.

Jornalista: Julia Chatarina | Editór: Rafy Belo

Imajen: Primeiru-Ministru, Taur Matan Ruak, Imajen Egas Cristovão