quinta-feira, 23 de maio de 2019

Konfrontu sira kontinua iha Jakarta no autoridade sira sei blokeia asesu ba rede sosial sira

PARTILHAR

Grupu hosi manifestante sira ho polísia sira, iha loron-kuarta ne'e, envolve fali iha konfrontu sira iha sentru Jakarta nian, ho protestu sira ne'ebé maka akontese iha fatin sira seluk iha Indonézia, halo autoridade sira anunsia blokeiu parsial ba rede sosial sira. 

Konfrontu foun sira - hafoin manifestasaun sira iha loron-tersa kalan no loron-kuarta dadeer ne'ebé halo ona ema na'in neen mate no na'in 200 kanek - akontese hela iha zona merkadu Tanah Abang nian, iha zona osidental kapital nian.

Iha konferénsia imprensa hodi ko'alia kona-ba situasaun atual, ministru kordenador hosi Seguransa, Wiranto, hatete katak autoridade sira sei blokeia asesu ba rede sosial sira iha zona balun, la konkretiza lokal sira.

Autoridade indonéziu sira hatete katak rede sosial sira, inklui aplikasaun sira troka mensajen sira, uza daudaun hodi kordena asaun sira hosi manifestante sira, balun defini hanesan "ajente provokador sira".

Autoridade esplika ona katak kaer ona ema sanulu resin no protestu sira ne'ebé violentu liu planeia hela hosi ajente sira ne'ebé la hela iha Jakarta.

"Fiar katak ema sira ne'ebé kaer ona hanensa insitador sira hosi distúrbiu sira", hatete hosi brigadeiru-jeneral Dedi Prasetyo, ofisial hosi Relasaun Públika Polísia nian.

Porta-vós polisial nega ona katak ema na'in neen ne'ebé mate hetan tiru hosi polísia, hodi afirma katak ajente sira ne'ebé iha rai laran uza de'it gás lakrimojéneu ho kañaun bee nian.

Konfrontu sira hahú hafoin manifestasaun ida hosi apoiante sira hosi eis-jeneral Prabowo Subianto, ne'ebé lakon iha eleisaun sira 17 Abril nian. Subianto anunsia ona katak sei protesta rezultadu sira iha Tribunal Konstitusional.

Hahú loron-tersa maka polísia indonéziu reforsa ona medida seguransa sira iha estadu alerta máximu ida ne'ebé sei aumenta to'o final semana ne'e.

Iha loron-tersa, loron ida antes previzaun, Komisaun Jeral hosi Eleisaun anunsia ona katak Prezidente Indonézia, Joko Widodo, eleitu fali ba mandatu daruak, ho 55,5% hosi votu sira, kontra 44,50% ne'ebé maka rival Prabowo Subianto hetan.

Protestu sira hahú ho forma pasífiku, iha loron-tersa kalan, iha zona Kebon Pala, Tanah Abang, iha sentru kapital nian.

Maibé, manifestasaun sai violentu liu bainhira, liutiha oras balun, manifestante balun lakohi sai hosi zona.

Polísia halo intervensaun uza gás lakrimojéneiu no kañaun bee nian no manifestante sira hatán ho fatuk sira, ho 'cocktails molotov' ho objetu sira seluk, no sunu kioske oioin no estrutura sira seluk.

Aleinde Jakarta, imprensa indonéziu ko'alia kona-ba protestu sira iha zona sira seluk nasaun nian, todan liu maka iha Pontianak, iha zona oeste Kalimantan nian, ne'ebé grupu deskoñesidu ida sunu ona postu ida polísia nian.

Lusa | SAPO TL
PARTILHAR

Author: verified_user

Publicação luso-timorense sem fins lucrativos

0 comentários: