DILI, 15 maiu 2019 (TATOLI) - Diretora
Jerál Kultura hosi Sekretaria Estadu Arte no Kultura, Cecília Maria Belo de
Assis, hateten tuir planu iha tinan ida ne’e governu sei halo levantamentu no
dezeña BoQ (Bill of Quantity), nune’e iha tinan oin governu bele harii
Sentru Kulturál iha Munisípiu Baucau no Liquiça.
Tuir planu estratéjiku, hosi
tinan 2011 to’o 2030 ne’e, governu atu harii Sentru Kulturál iha Postu
Administrativu hamutuk 105. Maibé dadaun ne’e, hosi 2011 to’o agora, governu
foin harii Sentru Kulturál ida iha Munisípiu Lautém maibé fazeadamente sei
harii iha munisípiu sira seluk.
“Sentru Kulturál nia funsaun
nu’udar fatin ida ne’ebé governu dezeña atu iha espasu ba espozisaun,
espetákulu (palku), kafé ho internete, biblioteka, muzeu no eskritóriu para
joven sira iha asesu. Tanba polítika nasionál ba kultura, ita harii sentru
kulturál ne’e para bele desentraliza asesu ba kultura,” dehan Cecília ba
jornalista TATOLI liuhusi entrevista ne’ebé hala’o iha nia kna’ar fatin,
Avenida Portugal, Dili, kuarta (15/5/2019).
Nia hatutan, joven no komunidade
sira iha munisípiu sira bele espresa sira-nia atividade kulturál iha Sentru
Kulturál ne’ebé governu prepara ona ba sira. Iha ne’ebá, responsável kultura
iha munisípiu halo programa, halo aprezentasaun, kria fatin soru-tais ba
inan-feton sira hodi soru-tais, halo fatin ida ba artezenatu, depois sira fa’an
no hetan rendementu ba sira-nia nesesidade loro-loron nian.
“Governu iha hanoin atu
desentraliza asesu ba kultura duké mai hotu iha Dili. Turista sira ne’ebé mai
vizita Timor, sira bele ba vizita munisípiu sira ne’e hodi hatene ita-nia
kultura ne’ebé oioin ne’e. Joven sira bele koñese sira-nia kultura rasik antes
atu koñese kultura hosi rai li’ur. Ita lakon boot, se ita la prezerva ita-nia
kultura,” tenik Cecília.
Jornalista: Cancio Ximenes | Editór:
Xisto Freitas
Imajen: Diretora Jerál Kultura,
Cecília Maria Belo de Assis. Foto: espesiál
Sem comentários:
Enviar um comentário