LEI LA FO DALAN ESKOLA PÚBLIKU SELU PROPINAS

Maske nunee membru Parlamentu Nasional balu inklui SPTL rasik apoiu politika Ministeriu Edukasaun nian atu selu eskola publika selu propinas.

“ME iha kompetensia atu fo apresiasaun ba iha eskola publiku sira atu selu propinas(SPP-red) maibe mos la ses mos lei ne’ebe mak vigora iha Ministeriu Edukasaun nia laran katak, iha lei baze de edukasaun nian katak novi anos eskola (Sembilan tahun-Red) gratuita ba ema hotu-hotu ne’ebe lian Indonesia katak SD to’o SMP ne’e mak gratuita, maibe iha ona nivel Sekundariu ne’e depende ona estrutura eskola idak-idak nian atu bele kria konselho dos pais iha eskola idak-idak nian hodi hato’o difikuldades eskola nian ne’ebe hetan konkordansia husi inan aman mak bele tau propinas,”espelika Francisco da Costa Fernandes ba Jornalistas sira iha ninia knar fatin Eskola Sekundaria Nu.4 Balide-Dili Kinta (8/10) horseik.

Nia dehan, Governu bele implementa planu ne’ebe refere, maibe tenki hasai despaixu ruma nune’e difini lolos eskola gratuita ne’e iha nivel ida ne’ebe nomos inan aman atu fo kontribusaun ne’e iha nivel ida ne’ebe atu nune’e entidades hotu bele komprende.

“SPTL sempre konkorda buat ne’ebe ME tau, maibe importante mak labele viola lei ne’ebe vigora iha TL liu-liu lei ensinu baziku,”Francisco haktuir.

Nia hatutan iha nasaun hotu-hotu eskola publiku tenki selu, maibe tenki desizaun hamutuk, labele desizaun mai husi parte ida deit para labele kontra lei e labele hamosu insatisfas husi entidades.

Parte seluk Laura Jevaveu, nudar xefe estudante Eskola Nu.4 de Setembro la konkorda planu ME implementa eskola publiku selu propinas.

“Planu ME atu eskola publiku sira selu propinas ida ne’e hau ladun satisfeitu, tanba ami ne’ebe mai eskola iha eskola publiku ne’e katak ami ne’ebe mak inan aman laiha kbiit laek mak mai eskola iha ne’e, tanba ne’e hau nudar xefe konselho Eskola Publiku 4 de Setembro Balide la satisfas ho palnu refere,”hateten estudante Laura.

Antes ne’e Direktor Eskola Baziku Filial Rumbia Caicoli, Abilio Soares dehan, nia parte la konkorda ho planu ME implementa eskola publiku selu propinas, enkuantu implementa nia sei protesta ME, tanba tuir lei eskola publiku la selu propinas.

PN Apoiu Selu

Ihaparte seluk membru Parlamentu Nasional (PN) apoiu planu Governu liu husi ME atu implementa eskola publikú selu propinas para bele hatama reseitas mos ba kofre Estado.

Razaun PN apoiu planu ME ne’e para oinsa inan aman bele kontribui liu-liu atu kontrola oan sira nia prenzensa iha eskola, tanba politika eskola gratuita ne’e ladun ajuda kualidade estudantes.

Maske nune’e tuir lei ensinu baziku eskola publiku gratuita la selu, tanba ne’e enkuantu Ministeriu Edukasaun implementa eskola publiku selu propinas tenke muda lei ensinu baziku nian.

“Hau hanoin ita kobra oituan iha propinas, inan aman selu oituan hau hanoin sira bele hakas ona oan sira para atu estuda no labarik sira nia disiplina ba eskola,”afirma Prezidente Komisaun F Parlamentu Nasional ne’ebe trata ba asuntu Saude, Edukasaun, Kultura, veteranus e Igualdade Generu, deputadu Virgilio da Costa Hornai.

Nai dehan, tempu ona eskola publiku selu propinas, maibe sujere atu labele ho montante ne’ebe maka bo’ot liu hodi labele hatodan inan aman ne’ebe ladun iha kapasidade finanseira.

“Buat hotu gratuita, maibe ita tenke haree mos situasaun, reseita ne’ebe iha, tinan-tinan ita hanoin katak servisu publiku sira ne’e atu gratuita deit, ne’ebe se ministeriu buka dalan atu haree oinsa mak inan aman sira bele kontribui ba propinas ida ne’e hanesan parte ne’ebe diak, propinas bele iha maibe labele todan liu,”tenik deputadu bankada PD, Virgilio.

Nunee mos deputada Ilda Maria da Conçeicão nundar mos membru komisaun F espelika katak, tuir lei ensinu baziku eskola publiku eskola gratuita la selu, tanba ne’e enkuantu Ministeriu Edukasaun implementa eskola publiku selu propinas tenke muda lei ensinu baziku fila fali.

“Karik Ministeriu Edukasaun iha planu atu selu propinas tenke muda lei ensinu baziku nian ne’ebe hetete dehan gratuitu,”espelika deputada Ilda husi bankada FRETILIN.

Nia hatutan tan katak, se Ministeriu Edukasaun hakarak eskola Publik sira selu propinas tenke muda lei no mai esplika iha Parlamentu Nasional konaba razaun tanba sa maka implementa eskola publiku selu propinas ne’e lao diak no ema hotu-hotu kontenti. Ola/Nes

Jornal Nacional