Bolseiru Ejize Direitu Ba ME

Kandidatu bolseiru 2014 ba segundu etapa hamutuk 60 resin ejizi nia direitu ba Ministériu Edukasaun (ME), tanba sira konkore vaga iha tinan 2014 maibé la konsege ba estuda iha rai liur to’o ohin loron.

Relasiona ho problema ne’e, reprezentante  bolseiru segundu etapa nian, Fernando da Costa Ximenes, hateten Ministériu Edukasaun rasik hasai vagas públiku iha 2014, ne’ebé iha momentu ne’eba, estudantes kuaze 200 resin maka konkore ba bolsu estudu ne’e.

“Ami senti orgullu tebes tanba bele hetan bolsa estudu ida ne’e. Iha 2015 maluk balun ne’ebé maka iha primeira etapa nian konsege ba duni liur, no iha mós segundu etapa nian nain sia (9) maka Ministériu Edukasaun eskolla sai nu’udar  reprezenta ba munisípiu hodi haruka ba Moçabique, maibé iha tinan ne’eba resposta ba karta ne’ebé maka ami manda ba sua eselensia matebian Fernando La-Sama, dehan katak tenki halo avaliasaun dezempeñu, tan ne’e maka ami la bele kontinua ami nia estudu iha 2015,” Fernando hato’o.

Fernando hateten, depois iha fulan juñu to’o novembru, sira rasik halo kursu preparatóriu ba bolsa estudu ne’e, no hetan mós assitensia hosi Diresaun Nasionál Dezenvolvimentu Siensia i Teknolójia nian ne’ebé maka delega hosi minístru hodi akompaña prosesu ba formasaun bolseiru.

Nia esplika, iha 2016 sira tenta marka audensia atu hasoru minístru maibé la konsege. Alende ne’e sira mós tenta nafatin marka audensia ho minístru maibé hasoru fila fali Diretór Jerál Ensinu Superiór  hateten katak, tenki hein tanba dezisaun  minístru hato’o lai maka diresaun kontaktu imi bele aranka.

“Iha janeiru nia laran ami hasoru fila fali diresaun maibé diresaun rasik ko’alia ba ami katak bolsa estudu ba segundu etapa nian la iha kontinuidade, tan ne’e maka ami senti triste,” Fernando hato’o ba Jornalista Matadalan iha Parlamentu Nasionál, Sigunda (08/02/16). Nia dehan, tan ne’e maka sira lori problema ne’e mai iha parlamentu nasionál para haree to’ok kazu ne’e, tanba Parlamentu Nasionál nu’udar uma fukun ba nasaun ida ne’e nian.

Alein de ne’e, nia mós rekomenda ba Ministériu Edukasaun atu toma responsabilidade ba planu ne’ebé maka iha 2014 nian hodi tau sira hanesan bolseiru importante ida ba planu 2016 nian. Iha fatin hanesan, Deputadu Parlamentu Nasionál husi Komisaun F, ne’ebé trata assuntu saúde, edukasaun, sosiais, juventude no desportu, promosaun sosiu ekonomiku de Mulher, Eladio A. Faculto haktuir, estudantes sira lakon ona esperansa ba desizaun ne’ebé foti hosi Ministériu Edukasaun.

Eladio dehan, atu prepara joven sira ba futuru nasaun nian presiza prepara ho didiak, Deputadu ne’e hateten, konsiderasaun governu hola iha tinan hirak ba kotuk hodi haruka bolseiru sira ba eskola iha rai liur, maibé bolseiru tuir fali mai ne’e hetan problema. Eladio esplika, governu rasik prepara diak tiha estudantes sira ne’e, husi universidade Piliphina ho Brazil mai fo formasaun iha periodu ida ona, depois akontese fali problema hanesan ne’e.

Deputadu membru Komisaun F ne’e afirma, estudante sira rasik la hetan oportunidade atu ba, maske sira liu ona no hetan ona rekoñesementu maibé Ministériu Edukasaun, diresaun ba rekursu umanu nian hateten fali katak estudantes sira ne’e tenki kompete fali vaga bolseiru  foun. Deputadu ne’e konsidera polítika ida ne’e la dun los.

“Ita atu implementa planu ida ne’ebé diak, ita tenta rezolve problema ho nia tempu ne’ebé diak maibé ita rasik tau difikuldades ba ita nia an, tempu hira maka ita tenki fo treinamentu fali, prepara fali joven sira ne’e no osan hira maka tenki sai tan hodi selu ema mai para fo formasaun,” Eladio preokupa.

Deputadu ne’e konsidera, Ministériu Edukasaun lakon nia responsabilidade atu bele asegura konfiansa  ne’ebé estudantes sira iha. Nia mós husu ba governu, liu-liu Minisériu Edukasaun urjentimente fo resposta ba estudantes sira, no suzere buka dalan oinsa atu haruka estudantes sira ne’e tenki ba duni tinan ida ne’e. (Júlia)

Matadalan