Justisa maka “Ukun Án”

Matadalan, editorial

Forsa Naval Indonézia liu-hosi kooperasaun ho Governu Timor-Leste fó asisténsia saúde gratuita ba sidadaun Timor. Asisténsia saúde ida ne’e timoroan balun konkorda no balun la konkorda. La konkorda tanba la’os asisténsia saúde gratuita ne’e maka prioridade ba povu Timor maibé husu deskulpa ba povu Timor maka importante. Tanba, iha pasadu, militár liu-hosi orientasaun Governu Indonézia halo violasaun direitus umanus ida grave kontra povu Timor.

Balun konkorda tanba lakohi husik leet de’it opurtunidade asisténsia saúde gratuita ne’e. Dehan mós katak kazu pasadu ne’e hanesan konsekuénsia ida atu harii nasaun. Tanba ida ne’e, husik kazu ne’e hanesan esperiénsia ida ba povu Timor.

Indonézia ne’e matenek duni. Asisténsia saúde ne’e hanesan polítika “halus” ida ne’ebé Governu Indonézia trasa atu lori timoroan sira haluha kazu pasadu. Asisténsia saúde mós hanesan “Es Kiko” ida atu halo malirin hikas timoroan sira nia laran ne’ebé manas iha tempu naruk nia laran tanba kazu krueldade ne’ebé militár Indonézia sira komete.

Timoroan sira durante tempu naruk ona maka hakilar kona-ba justisa. Maibé, dalaruma susar tebes atu hetan justisa loloos tanba kestaun polítika no ekonomia. Kestaun polítika maka líder sira hakarak harmoniza sira nia relasaun no tulun malu atu lori Timor tama iha ASEAN. Atu tama ASEAN, presiza nasaun barak nia apoiu liu-liu Indonézia ne’ebé maka hanesan fundadór ba ASEAN. Kuandu ita eziji beibeik kona-ba kazu pasadu, bele dezanima fali Indonézia atu lori TL tama iha ASEAN.

Kestaun ekonomia maka kuaze pursentu 90 Timor-Leste simu importasaun nesesidade báziku hosi Indonézia. Serteja, ukun na’in sira lakohi impata importasaun nesesidade báziku hosi Indonézia tanba de’it kazu pasadu. Nesesidade báziku importante tebes tanba hamoris timoroan. Tanba ne’e, timoroan sira tenki hateke ba futuru. Katak, bele eziji justisa maibé justisa ne’ebé loos ne’ebé ita eziji durante tinan barak ona ba mundu internasionál maka “ukun rasik án”. Ohin, prezente “ukun án” maka justisa ida ona. Obrigadu. (*)

Matadalan