Adriano do Nasimento: “Nain 6 Nee Mesak Fundador PD”

DILI – Prezidente Partidu Demokratiku (PD), Adriano do Nasimento, hatete PD ofrese ona ninia membru nain 6 atu servi povu no nasaun ida nee maibe atu sai husi PD difisil tanba membru governu nain 6 nee mesak fundador partidu deit.

Deklarasaun nee Prezidente Partidu PD, Adriano do Nasimento, fo sai ba jornalista sira iha uma fukun Parlamentu Nasional (PN) Kinta (05/05/2016).

Ami ofrese ami nia kuadru ba nasaun atu servi nasaun no povu no nee sira (CNRT) nia desijaun maibe ami nia desijaun mak nee se nasaun persija ami fo ami nia kuadru nain 6 nee para atu servi povu no nasaun no tur iha governu hanesan membru governu tanba sira nain 6 nee mesak fundador PD deit,” hatete Adriano.

Nia mos hatutan membru governu Partidu Demokratiku nain 6 neebe mak deklara an hanesan indenpendente hodi kontinua asumi kargu hanesan membru VI Governu Konstitusional, nee mesak fundador Partidu Demokratiku nomos lider PD nian, tanba nee tuir nia labele iha lia fuan ida andaikan atu sai husi PD.

Iha fatin ketak tuir Sekretariu Jeral Partidu CNRT, Dionisio Babo, katak membru governu Partidu Demokratiku nain 6 nee deklara an ona hanesan independente, maibe wainhira sei involve an iha partidu maka CNRT liu husi CPN sei foti desizaun seluk ida tan. Informasaun kompletu iha STL Jornal no STL Web, edisaun Sesta (6/5/2016). Thomas Sanches/Timotio Gusmao

Suara Timor Lorosae