Timor-Leste haree “investidór barak maka hakarak” - PM

Primeiru ministru Rui Maria de Araújo horisehik dehan iha Bruxelas katak “investidór barak maka hakarak bá investe iha Timór”, no ida ne’e hanesan opsaun polítika ida hodi hamenus dependénsia hosi nasaun refere ba ajuda esterna, mina no gás. 

“Investidór barak maka hakarak mai Timór, maibé ami mos hatene katak serbisu ne’e sei kontinua la’o maka’as,” dehan Rui Maria de Araújo ba ajénsia Lusa, no hatutan tan kona-ba importánsia hosi kontaktu ne’ebé hala’o iha Bruxelas durante loron rua.

Iha deslokasaun ne’e, Rui Maria Araújo halo parte iha Jornada Europeia ba Dezenvolvimentu no halo mos reuniaun bilaterál, ho prezidente Konsellu Europeu, Donald Tusk, no ho komissáriu europeu ne’ebé toma konta ba Koperasaun Internasionál ho Dezenvolvimentu, Neven Mimica.

Iha kapitál belga no europeia, Rui Maria Araújo aproveita mos “fahe esperiénsia kona-ba konstrusaun Estadu iha tinan 14 nia-laran, hafoin restaurasaun independénsia” inklui “hatudu ba parseiru hothotu kona-ba planu sira futuru nian, liu-liu ba iha objetivu dezenvolvimentu sustentável”.

"Ami hatene ho di’ak katak dezenvolvimentu sosioekonómika Timór nian sei hala’o ho dalan ne’ebé autosustentadu liu. Klaru katak ami sei kontinua presija apoiu hosi nasaun Europa nomós presija fornese nasaun ne’e hosi kapasidade mobilizasaun ba iha rekursu hirak ne’ebé importante atu dezenvolve nasaun no hosi ne’ebá maka ami halo reforma", dehan ba Lusa.

Araújo esplika liu tan katak "lasustentável bainhira depende nafatin ba parseiru dezenvolvimentu nomós depende barak liu ba iha rekursu larenovável, hanesan mina ho gás".

Ho opsaun refere maka investidór sira sei to’o iha Timór, liu-liu hodi harii fábrika simente no portu, dehan governante ne’e, no haktuir mos kona-ba operadór telekomunikasaun sira, investimentu ba otel, sentru konferénsia no sentru komersiál.

SAPO TL ho Lusa