Governu timoroan verifika hela situasaun ba tusan sira ne'ebé alega hosi Timor Telecom

Visi-ministru Finansa timoroan nian konfirma iha loron-kinta ne'e katak Governu konklui hela "investigasaun pormenorizadu" ida kona-ba alegadu tusan sira hamutuk dolár millaun 9,5 resin ne'ebé maka operadora Timor Telecom insisti katak seidauk selu.

"Hanesan tusan sira ne'ebé akumula iha tinan barak nia laran to'o fulan-Abril 2016 ne'ebé Timor Telecom alega katak Estadu la selu no sira sei verifika hela", deklarasaun hosi Helder Lopes ba Lusa.

Tuir nia esplika katak, Konsellu Ministru sira informa ona Ministériu Finansa hodi lidera ekipa téknika ida hodi verifika "alegasaun" hosi Timor Telecom ne'e iha ministériu ida-idak no iha instituisaun públiku.

"Verifikasaun sei hala'o hela iha kazu sira hotu. Identifika tiha ona kazu balun ne'ebé selu tiha ona maibé, maski nune'e, fatura kontinua haruka ba serbisu hanesan", nia hatete.

"Ami identifika ona pagamentu balun ne'ebé seidauk kontabiliza ida. No balun insisti katak laiha tusan ida", nia hatete.

Tuir nia esplika katak, iha kazu ida-idak husu ona ba utilizadór sira hosi serbisu komprovativu sira pagamentu nian ne'ebé hafoin ne'e sei halo kontraste ho orden sira pagamentu sira nian ne'ebé fó hosi Ministériu Finansa.

"Verifikasaun sei fó mai ami rezultadu tolu: ami selu millaun 9,5, ami selu parte balun hosi folin ne'e ka ami sei la selu buat ida tanba selu hotu ona. Ami tenki hakotu investigasaun hodi hatene", nia hatete.

Helder Lopes afirma ona katak "dezafiu ida" hosi rezolusaun hosi problema ne'e maka tanba Timor Telecom "iha de'it ema na'in ida hodi hasoru ho kliente Estadu", maski iha "pontu fokal sira" ba TT iha ministériu ida-idak.

Nia esplika katak Governu foti ona desizaun oioin hodi evita atu situasan ne'e repete iha futuru, liuliu ba fatura sira hafoin fulan-Maiu ne'ebé tenki haruka ba utilizadór sira, maibé ho koñesimentu hosi Ministériu Finansa nian.

"Ne'e sei permiti atu iha koñesimentu boot ida no kontrola no evita problema sira", nia esplika.

Governu desidi mós katak hahú loron 01 fulan-Jullu serbisu sira telefone nian ne'ebé agora daudaun iha pós-pagu sei muda ba pré-pagu, falta de'it desidi oinsá ho serbisu sira dadus no internet nian.

"Ita hotu iha limiti sira iha konsumu. Hanesan ezemplu, membru ida hosi Governu iha limiti ida ba dolár 400 fulan-fulan, xefe ida Departamentu nian bele iha 50. Sei muda no ami sei sosa "pulsa" (karegamentu) iha folin sira hanesan ne'e iha inísiu fulan nian", nia hatete.

SAPO TL ho Lusa