ME Esforsu Hadia Problema Edukasaun

DILI – Ministeriu Edukasaun (ME) esforsu hadia problema edukasaun neebe mak sei iha, maibe sei hadia fazeadamente, tanba bazeia mos ba orsamentu.

Tuir Ministra Interina Edukasaun Dulce Soares hatete, ME kontinua iha planu,atu hadia problema edukasaun neebe mak iha, maibe dala barak sira mos infrenta situasaun orsamentu ladaun too, neebe buat hotu bele halo tuir buat neebe mak bele, maibe buat sira nee nafatin sai preoridade ME nian, atu nunee ME ou governu tenke halo maibe halo buat sira nee sei tuir fazeadamente.

Hau hanoin laos problema eskola edukasaun laos teknik vokasional deit, maibe iha ensinu da aprendizajen ka nivel da ensinu hotu-hotu ME kontinua tau esforsu para hadia liu husi kurikulu, materia didatikus, kontinua fo formasaun ba profesores no mos hadia liu tan infraestrutura neebe mak iha,” katak Dulce ba jornalista Sesta (17/03/2017) iha ME Vila-Verde.

Nia hatete, aleinde nee mos servisu asosiasaun dos pais no profesores  ho komunidade tomak, tanba liu husi fator sira nee hotu mak bele kontribui ba kualidade edukasaun.

Koalia kona ba tekniku vokasaional ME mos kontinua tau atensau  hodi identifika profesores sira neebe mak mai husi background edukasaun atu bele ba hanorin iha eskola tekvok no planu ona iha tinan ida nee, no kontinuasaun ba futuru, kontinua hadia, tanba bainhira temin eskola tekvok  signifika katak  sira iha teoria i sira nia persentajen boot tebes iha pratika.

Iha parte Diretor Eskola Sekundaria Jeral 5 De Maiu Becora Manuel Verdial hatete, koalia kona ba problema edukasaun nee presiza tebes atu mellora nafatin, tanba nee bainhira hasoru difikuldade tenke toma atensaun bei-beik hodi nunee bele rezolve, maibe atu hadia kualidade laos dehan problema neebe mak iha nee atu hadia dala ida deit, maibe tenke haree oinsa ida neebe mak presiza liu atu tau atensaun uluk tenke haree hodi tau preoridade para bele hadia. Guilhermina Franco/ Jacinta Sequeira

Suara Timor Lorosae