Suspeitu Nain Rua Ba Kazu Ta’a Membru F-FDTL Kaptura Ona

Polisia Nasional Timor –Leste (PNTL) kaptura ona suspeitu nain rua ne’ebe diskunfia ta’a membru Falintil-Forsa Defeza Timor-Leste (F-FDTL) ida nia liman, iha Becora, munisipiu Dili.

Kazu ta’a membru F-FDTL nain ida ne’e akontese Domingo kalan, iha 15 Janeiru 2016, wainhira membru F-FDTL ne’e iha dalan fila ba markas, derepente hetan atake husi grupu joventude iha area Becora.

Segundu Komandante munisipiu Dili, Superintendente Asistente Euclides Belo, hateten antes kaer suspeitu nain rua ne’e, polisia kaptura ona ema nain 30 hodi sai sasin.

“Sira informa naran lubuk ida e PNTL promove, no agora ami kaptura ona suspeitu nain rua ne’ebe deskunfia sai autor principal ba kazu ne’e,” nia dehan.

Nia hatutan, suspeitu nain rua ne’e polisia kaptura iha 17 Janeiru 2017 iha munisipiu Baucau.

Nia informa, suspeitu nain rua ne’e kumpri ona 72 oras detein iha sela polisia no entrega ona ba tribunal hodi halo primeiru interogatoriu.

Iha parte seluk Membru Parlamentu (MP), Cesar Valente lamenta ho attitude jovens ne’ebe involve iha kazu ne’e, tanba halo ona krimi hasoru forsa ida.

“Ne’e tentative atu halakon ema nia vida, presiza atu halo investigasaun klean,” nia sujere.

Nia hatutan, investigasaun klean hodi hatene lolos tanba saida mak kazu ne’e bele akontese.

“See mak provaka uluk, presiza identifika lolos,” nia dehan.

Tanba nia dehan, forsa labele baku joventude arbiru, nune’e mos joventude labele baku forsa sira arbiru.

The Dili Weekly