Forma Governu Tarde Prezudika Dezenvolvimentu

DILI - Tuir observasaun jeral husi sosiedade sivil ba partidu nebe halo dialogu atu halo koligasaun no forma governu adia ba bebeik, ida nee tuir lolos iha kompetensia Prezidente Republika maka bele foti dezisaun. Forma governu tarde prejudika mos dezenvolvimentu.

Lia hirak nee hato husi Diretor Ezikutivu Fongtil Arsenio Pereira da Silva ba STL iha nia servisu fatin Kaikoli Dili Tersa, (29/8/2017).

Nia dehan Prezidente Republika maka iha kompetensia tuir konstituisaun haruka konaba hametin estabilidade no unidade nasional no garantia ba instituisaun sira seluk, maibe tanba kestaun politika deit ohin aban no bainrua bele muda. Ida nee mos bele prezudika ba dezenvolimentu ba povu nian, kaundu hein tan loron ida rua tan governu foun lamosu mai.

Husu tanba saa maka partidu mais votadu Fretilin halo ona dialogu ho partidu nebe nia bolu hanesan Khunto no PLP nusa laforma governu dadauk ona. Agora kualia konaba pasta premeiru Ministru nian, semaka serve ba iha neba, nee sou desidi maka partidu Fretilin. Tanba partidu PLP no Khunto bolu atu halo kumpleta deit, liu husi dalan koligasaun atu forma governu foun. Karik partidu nebe maka Fretilin bolu atu halo koligasaun nee hakarak husu kargu PM nee hanesan labarik maka tanis ba dosi nee defisil oituan.

"Tuir ami nia hanoin katak kestaun politika ohin, aban no bainrua bele muda. Agora Fretilin bolu partidu PLP, no Khunto atu halo kumpleta deit oinsa halo plataforma governu ida tanba Fretilin maka manan maioria. See ita hanoin deit hakarak pasta PM entaun hanesan labarik tanis ba dosi nee susar oituan. Tanba dezenvolvimentu nee maka importante liu,” dehan nia.

Iha oportunidade seluk, Adjuntu director Ezikutivu Komite 12 Novembru Rogerio Castro da Cruz nia hanoin katak sidadaun see deit maka atu simu pasta PM, nee dezisaun husi partidu mais votadus Fretilin nia liman. Tanba nee maka husu ba partidu mais votadu Fretilin atu halibur opiniaun no hanoin balun husi partidu PLP no Khunto nia konaba plata forma governu.

Agora pasta PM tenki hare ema nia esperensia servisu. fiar katak sedu ou tarde setemu governu konstituisional tenki lao. Selae prezudika makas ba programa partidu nebe uluk hatoo ba povu liu husi kampana eleitoral. Laos nee deit maibe mos prezudika ba Orsamentu Jeral Estadu (OJE).

Governu nee konsidera fakum ona tanba formasaun governu demora ba bebeik. Povu agora nee hein no instituisaun seluk mos. Maibe ida nee demora ba bebeik impaktu mos ba dezenvolvimentu nasional. Realidade governu nee labele lao tanba povu hein nafatin to bainhira maka governu nee mosu mai.

"Tuir nia hare katak sedeit maka hakarak atu ukun povu no nasaun ida nee no atu kaer pasta PM dezisaun final nee mai husi partidu maioria. Nia maka desidi tanba kuandu nia konvida parpol nebe atu apoiu nia hodi forma governu premeiru estar nia tenki desidi no oinsa partidu seluk nia hakarak,” nia dehan.

Premeiru Ministru Rui Maria de Araojo apelu mos ba sidadaun hotu-hotu atu tur hakmatek no sei prosesu nebe sei lao no dudu estadu ida nee ba oin. Husu mos ba povu tomak atu kontribui ba governu foun nebe mai.

“Hau nia esperansa nafatin atu dudu prosesu dezenvolvimentu sosiu ekonomiku Timor Leste nee ba oin. Husu ba sidadaun hotu-hotu tur hakmatek hodi hein prosesu nee lao,” nia reforsa tan. 

Justinho Manuel | Suara Timor Lorosae