quinta-feira, 7 de junho de 2018

Mandatu IV Lejizlatura Remata Tenke Entrega Karreta Prado

PARTILHAR

DILI: Sura de’it ona loron ba mandatu IV Lejizlatura atu remata, tanba ne’e kontinua ezije ba Konsellu Administrasaun Parlamentár atu fó xamada ba eis-deputadu III Lejizlatura atu entrega karreta.

Antes ne’e, eis-deputadu III Lejizlatura konsege hatama hikas fali ona karreta Prado hamutuk 42 no balun entrega fila-fali ba deputadu IV Lejizlatura hodi uza ba servisu parlamentár nian.

Husi totál karreta ne’ebé entrega ona ne’e Konsellu Administrasaun Parlamentár distribui balun ba fali bankada foun hanesan Partidu Libertasaun Populár (PLP) hetan karreta 4 no bankada partidu KHUNTO hetan karreta 2.

Diretór Ezekutivu Asosiasaun HAK, Manuel Monteiro hatete, Parlamentu Nasionál liu husi Konsellu Administrasaun foin lalais ne’e halo ona karta ida hodi hapara ona prosesu alienasaun ba karreta Prado nian.

Prosesu alienasaun hapara ona maibé eis-deputadu balun lori karreta ne’e ba uma to’o agora seidauk hatama konsidera ne’e aktu krime, korrupsaun no abuzu podér. Tanba ne’e, Konsellu Administrasaun presiza halo karta ruma ba ministériu públiku atu buka tuir dalan legál.

“Tenke entrega ona Ministériu Públiku atu haree hodi fó mandadu ba polisia sira buka tuir karreta hirak ne’e hodi lori mai fali”, dehan Manuel, iha knaar fatin, Sesta (1/6).

Ba V lejizlatura no VIII governu la konsege rezolve problema ne’e maka ema sei hanoin katak governu ne’e moos karik lae mak lejizlatura ne’e sai hanesan kortina ba prosesu sira ne’ebé la’o la loos iha VI governu konstitusionál nian.

Antes ne’e, Sekretáriu Jerál Parlamentu Nasionál, Adelino de Jesus hatete, asuntu ne’ebé relasiona ho karreta Prado ne’e asuntu polítiku tanba ne’e labele foti desizaun.

“Ha'u labele kolia, ne’e responsabilidade sekretáriu jerál anteriór no Prezidente Parlamentu sira mak bele kolia”, dehan nia.

Problema karreta Prado ne’e sai ona problema ne’ebé sosiedade hotu-hotu konsumu, tanba ne’e sai ona asuntu nasionál ho nune’e iha loron 14 Maiu bankada Partidu Demokrátiku (PD) hetan ona informasaun verbál husi Konsellu Administrasaun parlamentár no sira volontariamente sira entrega ona karreta ne’ebé durante ne’e uza ba servisu parlamentu nian.

Jacinto Xavier | Independente
PARTILHAR

Author: verified_user

Publicação luso-timorense sem fins lucrativos

0 comentários: