quinta-feira, 7 de junho de 2018

PN Lansa Rádiu No Versaun Foun Portal

PARTILHAR

DILI, (TATOLI) – Parlamentu Nasionál (PN) lansa Kanál Rádiu FM 92.9 Mhz “A Voz da Casa da Democracia” no portal ne’ebé antes ne’e iha ona maibé ho versaun foun ho enderesu www.parlamento.tl.

Prezidente Parlamentu Nasionál IV lejizlatura, Aniceto Guterres hateten meius komunikasaun ne’e atu sidadaun sira bele iha kontaktu no hetan informasaun konaba atividade uma fukun nian.

 “Objetivu estratéjiku oinsá mak promove kultura transparénsia no kultura abertura nune’e mós oinsá atu promove partisipasaun ativa sidadaun sira iha vida polítika”, tenik Aniceto ba jornalista sira iha ámbitu lansamentu iha PN, ohin.

Hodi hatutan inisiativa ne’e bazeia husi planu estratéjiku PN ne’ebé prepara dezde tinan 2016, maibé prosesu aprovizionamentu atu hola ekipamentu sira mak kleur liu tanba ne’e foin daudauk mak konsege rezolve no hahú instalasaun ba rádiu nune’e ohin funsiona ona, enkuantu portal iha antes ona no ohin halo lansamentu ba portal foun.

Antes ne’e deputadu sira sempre ezije atu iha tranzmisaun direita rasik liuhosi meius komunikasaun maibé tanba despeza ba televizasaun boot liu entaun deside atu instala kanál rádiu ho despeza ladún boot no jestaun ladún komplikadu hanesan televizaun.

Hodi dehan tan, rádiu hanesan meius komunikasaun ida ne’ebé sidadaun bele akompaña direita funsionamentu PN, liafuan husi deputadu sira nune’e sira bele komprende liu papél PN, hodi povu mós bele sente partisipa direita hanesan parte ida husi demokrasia.

“Hafoin eleisaun povu laiha kontaktu ho deputadu sira ne’ebé sira hili atu reprezenta iha PN maibé husi rádiu ne’e bele iha kontaktu liuhosi programa interativu no tranzmisaun. Ida ne’e parte husi edukasaun sívika, edukasaun polítika no rádiu hanesan instrumentu”, katak.

Iha intervensaun, deputadu senior ne’e hateten rádiu PN hanesan instrumentu fundamental komunikasaun nian atu divulga informasaun konaba serbisu parlamentár sira ba sidadaun no organizasaun sosiedade sivíl sira ne’ebé akompanha dezenvolvimentu polítiku Timor-Leste nian.

Entretantu, serimónia ne’e partisipa husi PPN, Vise PPN, reprezentante bankada parlamentár sira, Prezidente konsellu imprensa, reprezentante media komunikasaun sosiál nian, reverendu bispu Euvaristu Fernandes da Costa Soares, funsionáriu PN, sekretáriu jerál PN no konvidadu sira.

Antes ne’e PN iha ona portal ne’ebé lansa iha 9 Janeiru 2014 no sempre divulga  atividade uma fukun maibé ohin lansa versaun foun portal, enkuantu rádiu foin mak halo operasaun ohin no iha abertura PPN ho reprezentante bankada seluk halo intrevista badak iha estúdiu rádiu ne’e.

Jornalista: Julia Chatarina | Editór: Manuel Pinto

Imajen: Seremonia lansamentu Radiu FM 92.9 Mhz no Portal versaun foun Parlamentu Nasional. Imajen Tatoli/Antonio Gonçalves
PARTILHAR

Author: verified_user

Publicação luso-timorense sem fins lucrativos

0 comentários: