quinta-feira, 7 de junho de 2018

ANPM Foti Ona Amostra Hosi Fenómenu Bee Iis Mina rai Iha Tasi Tolu

PARTILHAR

DILI, (TATOLI) - Autoridade Nasionál Petróleu no Minerál (ANPM) foti ona amostra bee ne’ebé deskonfia ho iis mina no rai-henek metan kahur ho mutin iha área Tasi-Tolu hodi halo teste laboratóriu.

Fenómenu hetan bee ho iis mina ne’e iha área Tasi-Tolu bainhira kompañia China Wu Yi Limited ne’ebé halo estrada Tasi-Tolu-Tibar ne’e ke’e rai kuaze métru tolu hodi hetan bee ne’e.
Mateus da Costa, diretór ba atividade peskiza no esplorasaun ba petróleu no minerál, ANPM, hatete bainhira haree fatin ne’e mosu duni bee.

“Iha uitoan iis mina entaun ita lahatene ne’e husi mina matan ka la’e ou kontaminasaun baibain. Kolega enjeñeiru sira foti ona amostra bee ne’e para halo teste laboratóriu no foti raihenek metan kahur ho mutin, se iha duni indikasaun mina entaun orsida iha ne’ebá iha indikasaun hidrocarboneto iha laran”, Mateus katak horisehik iha Tasi-Tolu bainhira bá observa direta fatin ne’e.

Nia dehan bainhira liuhusi teste ne’e mak pozitivu duni mina maka ida ne’e ezemplu hanesan iha área sira tesik Suai. “Ne’e mina matan de’it, nia iis de’it, nia hun ne’e dook uitoan husi ne’e tanba iha Jeolojia ita bolu falla (fault) ne’e mak nia fatuk nakfera ne’e nia iis mina kuandu iis iha rai-kidun ne’ebá karik sa’e tuirmai”.

Hatutan se iha duni indikasaun natureza maka hanesan iha kosta súl ne’ebá tanba iha estudu ne’ebé halo iha indikasaun klaramente iha sistema petróleu.

“Se teste ida konteúdu buka to’o organic content ne’e laboratóriu iha Timór laiha tenke haruka bá liur, se test de’it haree hanesan kontaminasaun bee ne’e moos ka la’e ne’e ita bele halo iha Timór, mas kuandu iha ligasaun ona ho hidrocarboneto ne’e kompleksu uitoan, ita tenke haruka bá liur ne’ebé tenke han tempu”.

Indikasaun iha sistema petróleu ne’e iha iis mina duni, mas nia konetúdu boot ka la’e ne’e seidauk bele hatene tanba presiza estudu kle’an.

“Atu hatene katak ida ne’e fatuk ida bolu fatuk rai-henek entaun bee ho mina iis sai mai kahur ho bee ne’e mai mak prezerva tiha hamutuk ho bee iha rai-henek laran entaun sira ke’e tun bá mak hetan iha okos”.

Jornalista: Maria Auxiliadora | Editor: Manuel Pinto

Imajen: Ida ne'e mak fatin ne’ebé kompañia China Wu Yi Limited ke'e no hetan hetan bee ho iis mina. iha Tasi-Tolu.
PARTILHAR

Author: verified_user

Publicação luso-timorense sem fins lucrativos

0 comentários: