Prezidente dahuluk Institutu Seguransa Sosial timoroan nian simu pose iha Dili

Prezidente dahuluk no membru sira seluk hosi Instituto Nasional Segurança Social (INSS) timorense nian simu pose iha loron-tersa ne'e, iha Dili, pasu ida tan iha konsolidasaun ba sistema ida ne'ebé maka hahú vigora iha nasaun ne'e iha tinan 2016.

Alem hosi prezidente, Longuinhos Leto, nomeia mós Azevedo Marçal ho Cornélio Barros nu'udar vogal Konsellu Administrasaun nian, Alberto Carvalho Araújo nu'udar reprezentante empregadu sira nian no Ramalho da Costa nu'udar reprezentante traballador sira nian.

Iha serimonia simu pose nian, ministra Solidariedade Sosial timoroan nian, Armanda Berta dos Santos, subliña katak ne'e hanesan ba dahuluk iha Timor-Leste nia konta ho INSS hodi kumpri direitu "konstitusional no fundamental" seguransa sosial nian.

Governante ne'e iha esperansa katak responsavel foun sira INSS nian sei atua ho forma hodi kumpri objetivu sira instituisaun nian, no garante responsabilidade no serbisu ida "ho kualidade ba setor privadu no publiku, ba empreza sira no traballador sira".

Serbisu esensial ida hodi apoia traballador sira nasaun ne'e nian, hodi jere fundu seguransa sosial no sustentabilidade orsamentu iha futuru, nia hatete.

Ha'u apela hodi imi mantein integridade, lealdade, disciplina no kompromisu ho imi nian dever no rsponsabilidade. No permanese sensibilizadu ba dezefiu foun sira no ba problema sira ida organizasaun nian laran no liur", hatete ministra.

"Ne'e presiza vizaun no abordajen olistika ba mudansa liu hosi pensamentu reativu ida, inovador, no koñesedor sistema ba benefisiu instituisaun nian no utilizador sira nian", nia akresenta.

Responsavel INSS nian, nomeadu hosi Governu timoroan nian iha loron 21 Novembru, no asumi formalmente funsaun iha loron 05 Dezembru, bainhira rezolusaun nomeasaun ne'e publika iha Jornal Republika.

Hosi ne'ebá kedan, enkuantu seidauk halao serimonia pose nian, sistema seguransan sosial nian paralizadu no la iha kompeténsia hodi fó guia ba pagamentu kontribuisaun ka subsidiu parentalidade nian.

Ida ne'e halo tiha hodi la selu subsidiu parentalidade nian barak, ba traballador timoroan sira no emisaun guia pagamentu kontribuisaun seguransa sosial nian.

Too iha publikasaun rezolusuan Governu nian iha Jornal Republika, no tuir lei orgánika Ministeriu nian, kompeténsia ba prosesu ne'e Diretora Rejime Kontributivu nian.

Iha fulan Outubru 2016, Parlamentu Timor-Leste nian aprova rejime foun kontributivu Seguransa Sosial nian, iha diploma klasifikadu ida nu'udar istoriku.

Orsamentu Seguransa Sosial timroan nian ba tinan ne'e nian, sei analiza hela hamutuk ho Orsamentu Jeral Estadu nian (OJE) hosi Prezidente timoroan, ne'ebé maka prevé reseita sira ho total dolares millaun 70,9 ba tinan 2019, ho kontribuisaun sira hamutuk dolares millaun 28,6.

Reseita global sira inklui reseita efetiva sira tinan 2019 nian, ho valor dolares millaun 69,4 no saldu tranzitadu tinan 2018 nian, seidauk traferidu ba Funda Rezerva Seguransa Sosial nian.

SAPO TL ho Lusa