Prezidente Timor-Leste nian
komunika iha loron-kuarta ne'e ba Parlamentu katak nia desidi veta Orsamentu
Jeral Estadu nian (OJE) ba tinan 2019, no kestiona aspetu barak proposta lei
nian.
Iha mensajen ne'ebé haruka ba
Parlamentu, Francisco Guterres Lu-Olo husu fali "apresiasaun parlamentar
ne'ebé maka bele konsidera utilizasaun justa, ekilibrada no sustentavel no
efisiente ba rekursu finanseiru sira ne'ebé maka Estadu no Povu Timor-Leste nian
fó satisfasaun ba sira nian nesesidade esensial sira no kresimentu no
dezenvolvimentu nasional".
Hodi justifika desizaun ne'ebé
komunika hosi xefe Casa Sivil nian, Francisco Vasconselos, Lu-Olo kestiona
"insustentabilidade agravada OJE 2019 nian" tanba adota politika
ekonomika no finanseira ne'ebé asenta iha "orientasaun ida ne'ebé
kontrariu ho Konstituisaun no lei estruturante sira", "dezekilibriu
orsamental ne'ebé ass" no falta politika alternativa sira.
Iha konkretu, nia nota katak ne'e
hanesan OJE ne'ebé boot liu Orsamentu hothotu ne'ebé Timor-Leste iha to’o
ohinloron, ho valor dolares billiaun 2,132, ne'ebé maka obriga levantamentu
243% ne'ebé maka ass liu hosi valor sustentavel (RSE) Fundu Petroliferu nian.
OJE ne'e 66,9% ass liu hosi tinan
2018 nian no 53,7% hosi tinan 2017 nian.
"Maibé, ita labele haluha
katak presu mina iha merkadu mundiál mós tun dadaun ona, no osan ne’ebé tama
iha Fundu Minarai mós tun dadaun ona", nia argumenta.
"Ritmu atual hasai osan FP
nian ne'e tau iha kauza sustentabilidade Fundu ne'e rasik. Transferénsia sira
ho exesu ho nivel ne'ebé ass ne'e aselera estinsaun Fundu Petroliferu",
nia subliña.
Prezidente timoroan hatete katak,
politika ekonomika no finanseira ne'e "kontra regrea no prinsipiu sira
Konstituisaun Republika nian no lei estruturante sira", inklui mós
"rezerva finanseira obrigatoria, unidade orsamental nian no investimentu
elijivel, ne'ebé maka diretamente hosi FP".
Lu-Olo mós hatete katak proposta
ne'e la respeita programa Governu nian rasik ne'ebé maka asenta iha
"diversifikasaun ekonomika no kriasaun empregu, ne'ebé maka hanesan
priorizasaun investimentu relativamente ho kapital sosial no dezenvolvimentu
ekonomiku".
Prezidente mós nota katak besik
1/3 OJE nian destinadu "ba akizisaun hosi patrimoniu ba sosiedade
petrolifera estranjeira sira", iha konkretu dolares millaun 650 hodi sosa
partisipasuan ConocoPhilips no Shell nian iha konsorsiu Greater Sunrise.
"Husik de'it besik 10% ba
edukasuan no formasaun profisional, saude, agrikultura no turismu, hamutuk.
Hosi ida ne'e, menuz hosi 1% maka ba agrikultura, no 6% de'it ba edukasaun no
3% ba setor hotu saude nian, no turismu hela ho 0,54%", nia esplika.
"Valor sira kiik ne'ebé maka
la permite satisfaz nesesariu serbisu sosial sira no kresimentu ekonomiku iha
área referida sira", nia argumenta.
Finalmente, Lu-Olo konsidera
katak OJE ne'e pauta hosi "auzénsia politika alternativa sira (...)
finanseiramente ne’ebé bele konvense katak, biar la’ós sustentável, ita bele
lao ba oin, no iha prazu badak no médiu, ita bele hala’o dezenvolvimentu
sustentável no Estadu sei la tama iha falénsia finanseira ka fiskal cliff no
mosu fenómenu ne’ebé baibain ema bolu “maldisaun rekursus nian”.
Vetu prezidensial nian,
komunikadu iha loron ikus ba prazu loron 30 nian ne'ebé maka Lu-Olo apresia
dokumentu ne'e, entrega iha loron 24 Dezembru, obriga ba prolongamentu rejime
duodesimu nian, ne'ebé maka vigora dezde loron 01 Janeiru.
Parlamentu Nasional agora tenki
reapresia fali OJE ne'e, no presiza votu favoravel ho 2/3 hosi deputadu sira
ne'ebé prezente hodi obriga Prezidente promulga dokumentu ne'e.
Alternativa maka bele prepara
fali proposta foun OJE nian no submete ba xefe Estadu.
SAPO TL ho Lusa
Sem comentários:
Enviar um comentário