DÍLI, (TATOLI) - Governu
Timor-Leste halo enkontru ho embaixadór ASEAN sira ne’ebé nia rezidénsia iha
Timor-Leste (TL) hanesan Indonézia, Malázia, Filipina, Tailándia no Brunei
Darussalam hodi ko’alia kona-ba preparasaun TL nian hodi sai membru ASEAN
(Association of South East Asian Nation), liliu kona-ba TLAMP (Programa
Mobilizasaun Timor-Leste ba ASEAN-sigla inglés) nian.
Diretór Jerál Asuntu ASEAN, Jorge
Camões informa ba jornalista sira katak enkontru ne’e atu dehan ba embaixadór
sira ne’e kona-ba Timor-Leste nia determinasaun, komprimísiu; atu kontinua
prepara aan hein desizaun husi ASEAN nian ba TL sai membru ba organizasaun
aziátika ne’e.
“Ami fahe ho sira katak TLAMP
ne´e programa ida ba longu prazu, ita tau atu prepara ita-nia aan molok no
depois ita-nia adezaun ba ASEAN. La´ós atu sai membru ASEAN de´it mas depois
ida ne´e saida mak ita presiza halo?,” informa Diretór Jerál Asuntu ASEAN,
Jorge Camões, iha edifísiu Ministériu Negósiu Estranjeiru no Kooperasaun
(MNEK), Praia dos Coqueiros-Díli, ohin dader.
“Ami fahe informasaun ho sira
katak husi TLAMP ne´e ami forma ona grupu traballu né ebé mak atu serbisu
intensifikamente iha tempu oin atu prepara sasan hotu tuir pilár ASEAN nian;
polítika no seguransa, ekonomia no sósiu-kulturál,” hatutan diretór ne’e.
Diretór Jerál Asuntu ASEAN, Jorge
Camões informa mós katak iha tempu badak sei iha semináriu balun kona-ba oinsa
Timor-Leste identifika elementu krítiku molok sai membru ASEAN.
“Ao mesmo tempo, ita haree
fila fali buat ne´ebé mak la´ós tama iha elementu krítiku maibé ita kontinua
prepara aan atu nune´e bele integra ita-nia aan ba iha ASEAN. Ida ne´e mak ha´u
fahe ho sira,” nia haktuir.
Diretór Jorge Camões relata,
durante enkontru ho embaixadór sira husi membru ASEAN ho direitu pleno, ne’ebé
nia rezidénsia iha Timor-Leste hanesan Indonézia, Malázia, Filipina, Tailándia
no Brunei Darussalam, la’o di’ak tebes.
Embaixadór sira hotu ne´ebé mak
mai expresa sira-nia vontade atu koopera ho sira kona-ba preparasaun
Timor-Leste nian ba ASEAN.
“Agora ba oin, ita sei iha
atividade lubuk boot ida, hanesan sei haree cultural event (eventu
kulturál) ruma kona-ba tau filme ruma kona-ba ASEAN ninian, sei iha semináriu,
atividade gastronómiku; hahan ASEAN ninian. Atividade lubuk boot ida ita
prepara, ita karik konvida mós maluk balun husi li´ur atu partisipa mós iha
eventu sira ne’e atravéz embaixada ASEAN nian iha Timor,” dehan Diretór Jorge
Camões.
Iha fatin hanesan, Embaixadór
Indonézia ba TL, Sahat Sitorus ba mídia sira katak enkontru ne’e, enkontru
informál, ne’ebé Timor-Leste realiza ho sira ko´alia kona-ba faze preparasaun
Timor-Leste sai membru ASEAN.
“Iha buat barak ne´ebé ami
diskute informalmente, liliu kona-ba oinsa sekuénsia preparasaun ASEAN simu
Timor-Leste ka Timor-Leste iha prosesu nia laran atu sai membru ASEAN,” informa
Embaixadór Sahat Sitorus, ba jornalista sira, ohin dader, hafoin enkontru
informál ne´e.
Prosesu ne´e, tuir Embaixadór
Sahat Sitorus, la´o ho di´ak no ekipa traballu ne´ebé hakna’ar aan, tantu
ekonomia, polítika, ne´e fó atensaun ida ne´ebé mak importante tebes no
planeadu katak iha meadu tinan ida ne´e “fact finding” sei mai iha Timor-Leste,
ne´ebé preparadu ona ho kestionáriu lubuk ida, ne´ebé sei responde husi
Timor-Leste.
“Ha´u hanoin, husi ne´ebá, ita
sei bele movimenta ba oin, maizmenus preparasaun Timor-Leste to´o iha ne´ebé
mak hala´o ona, defisiénsia ka saida mak mak nesesáriu atu kumpleta
nomeadamente rekursu umanu, regra, regulasaun, kondisaun iha rai laran”
konsidera diplomata Indonézia ne´e.
“Timor-Leste husi aspetu
seguransa di´ak tebes, governasaun mós estável, ho signifikasaun katak eleisaun
la´o fluente. Ne´e nota ida ne´ebé pozitivu tebes. Mundu haree katak
Timor-Leste, nu´udar ida ne´ebé mak di´ak tebes. Ida ne´e presiza defende ba
oin,” nia hatutan.
Embaixadór Indonézia, Sahat
Sitorus haktuir katak ho embaixadór TL ba ASEAN, Jorge Camões durante enkontru,
partilla ona ideia katak asuntu ne´ebé prezisa, mezmu seidauk kumpletu, maibé
iha asuntu lubuk ne´ebé tenke tau atensaun katak prontidaun rekursu umanu,
instituisaun, regra sira tanba iha ASEAN rasik sei iha asuntu kooperasaun
ne´ebé nia relasaun metin loos.
“Tanba ne´e, embaixadór ASEAN
sira ohin, ami rasik; Tailándia, Filipina, Brunei no Malázia promete, bele
komunika ba idaidak nia kapitál, diretór jerál no Ministériu Negósiu
Estranjeiru idaidak atu prontu ajuda ita-nia belun sira iha Timor-Leste iha
aspetu capacity building no buat saida de´it mak Timor-Leste
presiza,” diplomata Sahat Sitorus informa.
“Serake ida ne´e preparasaun
prosedurál, regra ka aspetu saida de´it mak presiza hetan atensaun, nu´udar
preparasaun Timor-Leste sai membru ASEAN,” hatutan diplomata ne´e.
Notísia relevante: http://www.tatoli.tl/2018/11/mnek-lina-ministerial-koalia-tlamp-koordena-serbisu/
Jornalista: Rafy Belo | Editór:
Manuel Pinto
Imajen: Embaixadór sira hasai
foto hamutuk hafoin enkontru. Foto: MNEK
Sem comentários:
Enviar um comentário