Primeiru-Ministru Apoia Konsensu Polítika

DILI, (TATOLI) – Primeiru-Ministru (PM), Taur Matan Ruak, apoia konsensu polítika entre partidu polítiku sira nu’udar dalan oinsá solusiona impase polítika rai-laran.

“Ha’u hanesan Primeiru-Ministru iha dispozisaun apoia ba saida maka Prezidente Repúblika hanoin atu halo ba oin no inisiativa hotu-hotu inklui diálogu no konsensu”, Xefe Governu ba jornalista sira iha Palásiu Prezidente Nicolau Lobato, Bairru Pité, kinta ne’e, hafoin enkontru ho Xefe Estadu kona-ba Orsamentu Jerál Estadu (OJE) 2019 ne’ebé Prezidente Repúblika veta ona.

Nia hatutan importante ba nia maka oinsá OJE 2019 fila hikas mai Prezidente Repúblika atu estuda, tanba ida ne’e maka hanesan atividade ida ne’ebé urjente loos.

Tuir Taur nasaun ne’e orgaun másimu liu maka Prezidente Repúblika, tan ne’e dezde Xefe Estadu toma inisiativa ne’ebé di’ak no hanoin di’ak ba nasaun, laiha ema ida maka la apoia.

Kona-ba OJE 2019 ne’ebé veta ne’e, Taur hateten Governu tenke diskute ho Parlamentu Nasionál (PN), liu-liu saida maka tenke halo fila fali, nune’e bele haruka hikas ba Prezidente Repúblika.

“Tanba hodikalan no ohin dader maka lee konteúdu veta ne’e, entaun ami seidauk iha desizaun no planu saida maka sei halo loos. Maibé, naturalmente, iha tempu badak ami (Konsellu Ministru) sei haree ba kestaun ne’e hamutuk ho Parlamentu Nasionál”, akresenta.

Maske veta, nia tenik sei iha orsamentu duo-désimu atu bele mákina Estadu ba janeiru, fevereiru no posibilidade bele to’o marsu.

Taur dehan Governu sei halo esforsu tomak atu minimiza duo-désimu tanba bainhira moris ho duo-désimu beibeik bele afeta ba dezenvolvimentu, liu-liu osan sei laiha atu bele selu traballadór sira no inan-aman sei laiha osan atu selu oan sira nia eskola.

Jornalista: Xisto Freitas | Editora: Rita Almeida

Imajen: Primeiru-Ministru, Taur Matan Ruak. Imajen Antonio Goncalves