Xanana Lidera Komisaun ba Preparasaun Festa Konsulta Populár

DILI, (TATOLI) - Lider rezisténsia Kay Rala Xanana Gusmão, asume hikas knar no responsabilidade nu’udar prezidente komisaun organizadora ba komemorasaun festa konsulta popular ne’ebé atu selebra iha loron 30 Augusto, tinan ne’e.

Atu asegura di’ak liu tan, lala’ok selebrasaun loron importante ba istória independénsia Timor-Leste nian ba dala-20 (20 Augusto 1999-20 Augusto 2019) ne’e, ohin, iha salaun Ministériu Negósiu Estranjeiru no Kooperasaun (MNEK), figura karizmátiku Kay Rala Xanana Gusmão, marka enkontru ida ho liña ministeriál, inklui Sekretáriu Estadu ba Asuntu Veteranu no Kombatente Libertasaun Nasionál (SEAVKLN) no mós Ministériu Negósiu Estranjeiru no Kooperasaun (MNEK) atu atualiza preparasaun.

“Koordenasaun sira ne’e hotu tenke la’o”, hateten Xanana Gusmão, hodi fó orientasaun ba liña ministeriál hamutuk mós ho instituisaun F-FDTL ho PNTL ba halo koordenasaun no preparasaun ba serimónia popular ne’e.

Iha sorumutuk ne’e,  Kay Rala Xanana Gusmão, akompañadu husi Ministru Negósiu Estranjeiru no Kooperasaun, Dionísio Babo Soares no mós Sekretáriu Estadu Asuntu Veteranu, Gil Monteiro “Oan Soru” hodi aprezenta no prevee planu, programa no atualiza informasaun relevante ho preparasaun ba komemorasaun loron konsulta popular.

Iha aprezentasaun, Ajénsia notisioza TATOLI observa mós katak, iha mós asuntu no kestaun temátiku ne’ebé mak promove no diskute hodi bele realiza eventu nasionál ne’e ho efetivu no efikásia.

Xanana mós  orienta reprezentante liña ministeriál sira hodi bele akumula hanoin no ideia inovativu sira, hodi bele diskute iha atualizasaun planu no programa iha sorumutuk tuir mai. Inklui, orienta atu komemora loron istóriku sira ne’e fazeadamentu iha nivel munisípiu atu timoroan hotu bele sente valór no sentidu loron sira ne’e.

Tuir ajenda ne’ebé mak iha, sorumutuk tuir mai sei hala’o  hikas iha loron 15 Abril, semana oin, iha salaun MNEK.

Notísia relevante: http://www.tatoli.tl/2019/01/seakln-mnek-hahu-diskute-komemorasaun-loron-istoriku/

Jornalista: Rafy Belo | Editór: Francisco Simões

Imajen: Eis Primeiru-Ministru Kay Rala Xanana Gusmão, akompaña husi Ministru Negósius Estranjeirus no Kooperasaun (MNEK), Dionísio da Costa Babo Soares, lidera enkontru ne'ebé koalia kona-ba Perparasaun Selebrasaun ba Da-20 Aniversáriu Referendo (konsulta Popular) no INTERFET mai Timor Leste, iha Salaun Diplomata MNEK, Kinta (04/04/2019). Imajen/Egas Cristovão