Hosi: Dom Carlos Filipe Ximenes
Belo, SDB
Iha loron 4 fulan Setembru,
Akidioseze Dili halo tinan moris ka eresaun nian. De faktu, iha loron 4
setembru 1940, Amu Papa Pio XII (dehan Piu Doze), ho surat ka bula Solemnibus
Conventionibus, harii iha Kolónia portugés Timor, Dioseze ida. Iha dokumentu
ne’ebá, Amu Papa Pio XII hakerek: “Ikus liu, iha illa Timor, iha rejiaun ne’ebé
depende ba Repúblika Portuguesa, to’o agora jurisdisaun dioseze Makau nian, ami
haketak hosi Makau no foti henesan dioseze ne’ebé sei bolu Dili, no ami
konstitui nia sufragánea hosi Igreja Metropolitana Goa nian, no ami sujeita
bispu sira pro tempore ba direitu Metropolitanu Arsebispu Goa, Damão no Diu”.
Ho surat, Amu Papa Pio XII foti
Bispu ba Dioseze foun, Vigário jerál no Superiór das Missões de Timor, padre
Jaime Garcia Goulart, ema hosi Açores; ne’ebé iha loron 18 fulan janeiru tinan
1941, sai Administradór Apostóliku ho dignidade Moseñor nian.
Iha tinan 1940, Dioseze Dili
halaran (abranje) rai Timor Loro sa’e tomak. Misaun ka parókia iha tinan
ne’ebá: Parókia Dili, misaun Manatutu, misaun Soibada, misaun Oekusi, misaun
Baukau, misaun Ossú, misaun Hatolia, misaun Suro (Ainaru), misaun Alas.
Amu-lulik sira Iha Dili:
Monsenhor Jaime Garcia Goulart, Administradór Apostóliku; padre Artur Basilio
de Sá, ekónomo, padre Jacinto António de Campos; Iha parókia Dili: padre
Porfírio Francisco Campos no padre Alberto da Ressurreição Gonçalves; misaun
Manatutu: padre Diogo José d’Almeida no padre Ezequiel Enes Pascoal; misaun
Soibada: padre Januário Coelho da Silva no padre Jorge Barros Duarte no padre
Manuel Luís; misaun Oekusi: padre Francisco Durão Quintão; misaun Baukau: padre
Francisco dos Santos Afonso no padre Manuel António Serra; misaun Ossú: padre
Norberto Parada; misaun Hatolia: padre Francisco Madeira, no padre Carlos da
Rocha Pereira, misaun Suro (Ainaro): padre Norberto Amaral no padre António
Pires; misaun Alas: padre António Grebaldo Fernandes.
La kleur de’it funu japonés hahú:
Tanba situasaun susar, Mgr. Jaime Garcia Goulard ho amu-lulik balu no madre
Kanosiana sira sees tiha hodi ba hela iha Australia, to’o fulan Dezembru 1945.
Iha fulan Outubru, Mgr. Jaime simu ordenasaun episkopál iha Sydney. Nia mak
Bispu Dili nian ba dala uluk. Don Jaime ukun Dioseze Dili to’o tinan 1967.
Troka nian, amu Bispu Don José Joaquim Ribeiro.
Iha tinan 1996, Dioseze Dili fahe
ba rua: Dioseze Dili no Dioseze Baukau (Bispu Don Basílio do Nascimento). Bispu
Carlos Filipe rezigna tiha, ukun Dioseze Dili hanesan Administradór Apostóliku,
Don Basilio do Nascimento, Bispu Baukau nian. Iha tinan 2004, tanba situasaun
normál fali ona, Santa Sé foti Don Alberto Ricardo ba Bispu Dili. Tanba Don
Alberto mate, Vatikanu foti tan Don Basilio hanesan Administadór Apostóliku.
Iha tinan 2010, Dioseze Dili fahe
tan dala Ida: Dioseze Dili no Dioseze Maliana (Bispu Don Norberto Amaral)
Iha tinan 2014, Santa Sé hili Don
Virgilio do Carmo da Silva, S.D.B. ba Bispu Dioseze Dili, no iha loron 11 fulan
Setembru 2019, Amu Papa Francisco harii Provínsia Eclesiástica iha Timor-Leste,
no foti Don Virgilio Ba Arsebispu.
Bispu sira ne’ebé ukun Dioseze
Dili no ikus ne’e Arkidioseze Metropolitana: Don Jaime Garcia Goulart
(Administradór Apostólico: 1941-1945; Bispu: 1945-1967)
Don José Joaquim Ribeiro (Bispu
Coadjutor: 1965-1966; Bispu: 1967-1977) Mgr.
Martinho da Costa Lopes
(Administradór Apostóliku: 1977-1983)
Don Carlos Filipe Ximenes Belo,
S.D.B. (Administradór Apostóliku: 1983-1988; Bispu: 1988-2002)
Don Basílio do Nascimento
(Administradór Apostóliku: 2002-2004)
Don Alberto Ricardo da Silva
(Bispu: 2004-2015) Don Basílio do Nascimento (Administradór Apostóliku:
2015-2016)
Don Virgílio do Carmo da Silva,
SDB (Arsebispu: 2016- …)
Parabéns ba Arkidioseze Dili,
Parabéns ba Amu Arsebispu, amu-lulik sira, madre ka irmã sira, irmaun relijiozu
sira, katekista sira, seminarista sira no sarani no povu tomak.
PARABÉNS!
Lisboa, 3 Setembro 2020
Dom Carlos Filipe Ximenes Belo,
SDB
TATOLI
Sem comentários:
Enviar um comentário