Evita abuso de poder iha instituisaun Estadu, Ângela sei keixa Lere ba MP

Grupu Rezisténsia Nasionál Defende Justisa no Konstituisaun RDTL (RNDJK), ne’ebé lidera husi Âgela Freitas, deklara, iha tempu badak sira sei hato’o keixa ba Ministériu Públiku (MP), hodi evita abuso de poder iha instituisaun Estadu ne’ebé Lere lidera.

Ami mós prepara dokumentu ruma atu hatama ba iha MP, tanba ida ne’e demais liu ona, depois sempre hatudu liman mai Ângela Freitas, ema hotu hatene Ângela Freitas la’os lidera instituisaun F-FDTL. Tanba ne’e ami-nia parte jurista prepara ona advogadu sira, atu nune’e bele aprezenta iha MP, ema hotu  iha lei nia okos. Sé ita la keixa ba MP ukun na’in sira agora ne’e kontinua nafatin abusa de poder. Ita hotu iha lei nia okos seja quem for Prezidente Repúblika to’o Aileba”, esplika Porta-Voz RNDJK RDTL ne’e ba jornalista sira Segunda (07/09/2020), iha  ninia rezidénsia Bairu Formosa, Díli.

Ângela Freitas rejeita akuzasaun Majór Jenerál Lere nini’an, ne’ebé dehan nia envolve iha kazu  matebian Alfredo Reinaldo no Mauk-Moruk.

“Ha’u la envolve iha kazu Majór Alfredo nia mate. Tanba ne’e duni labele tuda fatuk subar liman. Ita hotu hatene iha momentu iha Komisaun inkéritu internasionál ne’ebé finaliza relatóriu ne’e rasik, ha’u-nia naran Ângela Freitas laiha laran. Pior liu tan kondena mós ho ita-nia aman Mauk-Moruk nia mate, ida ne’e mós ha’u la envolve”, dehan Ângela.

Porta-Voz RNDJK RDTL ne’e dehan,  hanesan  dirijénte  polítiku nia  iha responsabilidade ba rai ida ne’e, entaun sé de’it mak  husu atu sai nu’udár mediadóra nia prontu.

“Komandante Mauk Moruk mós ha’u-nia família rasik labele mai akuza sem faktus konkoreta. Problema sira durante ne’e akontese inkapasidade de lideransa, ita mak lidera tiha instituisaun dún fali ema sivíl halo problema ba oho ema sivíl, pior liu ba oho ema militar. Ângela Freitas laiha kilat atu ameasa sé de’it, Ângela Freitas uza kakutak  haree diagnosa situasaun iha rai-laran  ne’ebé viola konstituisaun”, dehan nia.

Tuir loloos iha loron 4, fulan Setembru ne’e, iha asaun pasífiku, maibé tanba intervensaun husi F-FDTL, povu sira haree deklarasaun Jenerál Lere intimidasaun boot ida, buat ne’ebé jenerál fo sai mós krime, labele akuza ema sem faktus.

“Majór Alfredo ninia mate ha’u la envolve, la’os ha’u mak lidera instituisaun F-FDTL, sé mak lidera instuisaun F-FDTL mak toma responsabilidade ema sira nia mate ne’e, dehan tan.

Ângela Freitas  akresenta,  misaun F-FDTL tuir konstituisaun RDTL artigu 147 mak atu asegura povu husi ameasa externa no artigu 147 mak ba misaun PNTL atu garante seguransa interna, maibé pelu kontrariu Jenerál Lere orienta fila-fali F-FDTL grupu ida ba halo vijilánsia fali iha Ângela Freitas nia iha Bairu Formosa.

“Ho intervensaun forsa armadas ni’an halo povu sente preokupa ba situasaun no pániku nafatin telefone  kalan no loron. Ita hotu hatene iha artigu 146 no 147, militar ninia kna’ar mak asegura kazu ameasa iha externa iha rai-laran, PNTL mak hala’o nia kna’ar hodi asegura sivíl sira halo demonstrasaun, mas pelu kontrariu ita dismente tiha iha operasaun kobra”, dehan Ângela Freitas.

Tuir Ângela, Xefe Estadu Maior F-FDTL, Major Jeneral Lere Anan Timur viola tiha ona konstituisaun. “Jeneral Lere viola konstituisaun. Nia rasik hatene katak, nia viola tiha ona konstituisaun iha artigu 146, tanba ida ne’e kna’ar polísia nian. Iha situasaun ne’ebé presiza duni intervensaun, entre F-FDTL ho Polísia mak bele hala’o operasaun ne’e. Mas em quanto situasaun normal hela intervensaun militar halo pániku ita-nia sidadaun sira ne’ebé ja está preparadu konsolida atu tún, ho akontesimentu ida ne’e paraliza tiha buat sira ne’e hotu no la fó liberdade ba sidadaun sira atu hala’o sira-nia atividade, espresa sira-nia hanoin ba buat ne’ebé mak akontese iha ita-nia rai violasaun konstituisaun”, tenik nia. avi

GMN TV | Grupo Média Nacional