Reuniaun CPLP Ba Dala XIII Tama Ba Loron II Koalia Asuntu Trabalho No Social

Dili, Radio Online, Reuniaun durante loron Lima, hahu loron 27 Abril - 10 Maiu, entre Comunidade dos Paises da Lingua Portuguesa (CPLP) ba dala XIII, Koalia liu konaba area trabalho no asuntu sociais, iha Tersa, 28/4/15, iha Ministeriu Negosiu Estranjeiru e Kooperativu, Pantai Kelapa.

Ministra Solidaridade Sosial Isabel Guiterres, hateten katak, “iha loron ba daruak ne’e koalia liu konaba sistema protesaun no seguransa social iha Timor-Leste, topiku ne’ebe debate iha reuniaun ne’e konaba sistema sociais iha ita nia rai laran no trabalho nian, konaba  sistema pensaun ba funsionariu sira ne’ebe idade boot no ita hetan mos esperiensia husi ema matenek nain sira iha area sociais nian, katak planu politika didiak atu labele hetan impaktu ba servisu sociais nian,”dehan Isabel.

Isabel akresenta tan, “iha reuniaun koalia mos koalia konaba programa bolsa da mae, ba Inan-Aman sira ne’ebe iha oan barak no laiha kbiit, koalia mos konaba maluk sira ne’ebe defisiente, oinsa mak atu ajuda sir no la tau diskriminasaun ba sira, koalia mos konaba dezastre naturais nian”. tenik Isabel.

Iha Fatin hanesan Direktor Jeral SEFOPE  Jacinto Barros Gusmão esplika katak, “iha reuniaun debate mos konaba oinsa mak  atu kria  kondisaun ba trabalhador sira iha Timor-Leste no oinsa atu valorize trabalhador sira, ita mos koalia oinsa atu dignifika no hasae kapasidade trabalhador sira nian, atu hare mos ba ema ne’ebe halo diskriminasaun ba trabalhador sira, tenke valorize ema hotu-hotu, tamba ema mak xave ba dezenvolvimentu”, informa  Jacinto.

Fatima Afonso – Rádio Liberdade Dili