Governu rekoñese katak projetu "aumenta" iha pasadu

Primeiru ministru, Rui Maria de Araújo ohin rekoñese katak, iha pasadu, projetu oioin ne’ebé Estadu kontrata ba “aumenta” no bazeia ba proposta ne’ebé hala’o daudaun, sei halo poupansa ne’ebé bot. 

"Iha tinan finanseiru kotuk iha indísiu, ezemplu, iha projetu barak maka aumenta. Ita sei presiza análize detallada liu tan kona-ba ida ne’e", tenik ohin Rui Maria de Araújo iha aprezentasaun relatóriu kona-ba loron 100 nia Governu nian. 

Ho títulu "Servisu ho rigor no responsabilidade" relatóriu tinan 100 VI Governu Konstitusionál nian komprova, tuir primeiru-ministru, atinji ona "progresu signifikativu balun".

Entre aspetu sira seluk relatóriu ne’e refere katak desde nia simu pose, iha loron 16 fevereiru, Governu analiza proposta infraestrutura foun 35, iha kazu ne’e konsege hamenus valór totál hosi dólar millaun 85,6 ba 55,7 , ne’ebé reprezenta poupansa ho millaun 29,9.

Kestiona ona-ba poupansa ne’e implika katak, iha pasadu, iha kustu inflasionadu, Rui Maria de Araújo rekoñese katak akontese, no friza katak esforsu ezekutivu nian hatudu katak bele ko’a gastu.

"Ida ne’e hatudu prova katak iha kapasidade hodi halo análize detalla liu tan ba projetu sira karik konsege poupansa", nia esplika.

Relatóriu ne’e esplika katak, atualmente, iha projetu infraestrutura bázika 86 maka la’o hela, iha setór sira maka hanesan eletrisidade, estrada no ponte no bee no saneamentu, no seluk tan, ho valór globál dólar millaun 40.

Lansa mós primeira pedra iha sistema abastesimentu bee iha Manatutu, instala kontadór elétriku 600 iha Oekusi no 5.000 iha Maliana no Baukau, no Governu konsege iha setór elétriku reseita ho millaun 6,9, ka 35% hosi ne’ebé prevista ba tinan tomak.

Kona-ba dezenvolvimentu ekonómiku, relatóriu ne’e destaka projetu irigasaun agríkola foun ida ho hare ektare 780 iha Bulutu (Laleia), inaugurasaun ba eskola foun agríkola no apoiu formasaun ba grupu agrikultór 12.

Implementa mós Programa Sentru Dezenvolvimentu Komunidade Agríkola (CDCA) iha suku 40 (fregezia), harri tanki piskikultura foun kuaze 50 no inaugura sentru produsaun semente foun ida iha Baukau.

Ezekutivu hasai lisensa no distribui ai-oan 150 hodi kuda, iha área ho totál ektare 200 iha munisípiu 12, konklui baze dadus ne’ebé permiti komprova katak iha Timor-Leste iha tratór 163 "sei operasionál".

Formasaun taxista 220 iha Díli – kona-ba tema oinsá étika, atendimentu, norma no regra tránzitu - no formasaun ba ema na’in 100 iha fabriku tais, jestaun no marketing no produsaun marmelada konklui iha períodu ne’e.

Governu estabelese mós, hanesan empreza públika, Sentru Lojístika Nasionál (CLN), ne’ebé fornese ona fós tonelada 2.284 iha nasaun tomak.

SAPO TL ho Lusa