LABELE TABELE DEMAIS BA PROJETU GOVERNU

Ministru Planeamentu Investimentu Estratéjiku, Kay Rala Xanana Gusmão husu ba setor privadu atu hanoin ona investe, labele hanoin deit obra husi Governu, tanba sei iha área barak mak presiza dezenvolve.

Ministru Xanana mós husu ba setor privadu sira atu labele depende ba komisi, hodi lalin investor sira husi rai seluk mai TL no labele hanoin deit atu halo hotu obra ida, hodi hetan osan atu ba pasiar iha Indonesia. Ba Xanana, diak liu la’o neneik ho diak, duke la’o ansi maibé lahare ba kotuk no sorin-sorin, tanba komisi.

“Ha’u husu ba Prezidente CCI-TL, hare tok turismu, hare pekuaria, peska, la’e ita la ba oin. Hot-hotu labele hadau malu atu kaer obras deit, tanba obras Estadu nian ne’e, iha loron ida sei hotu. Se hotu setor privadu sira atu tabele ba ne’ebé,” afirma Ministru Xanana Gusmão ba setor privadu iha sorumutu Governu ho setor privadu sira iha Timor Plaza, Kuarta (27/5).

Xanana mos enkoraja setor privadu sira atu koalia ba malu, hodi komesa mellora setor privadu ida-idak nia intervensaun, hodi senti katak, imi nian duni.

“Agora imi tenki investe imi nia kakutak, hodi ikus fali mai Estadu fornese instrumentu ida atu imi bele investe, hau fiar ita hotu sei investe iha dezenvolvimentu TL ninian,” informa Xanana.

Tanba ne’e, tinan ida ne’e Governu sei loke banku imprestimu ba setor privadu sira, tanba nia lakohi atu setor privadu sira sai obstakulu ba Planu Dezenvolvimentu Nasional (PDN) Timor Leste nian, ne’ebé planeadu tiha ona.

Xanana dehan, kuandu setor privadu sira senti ona katak, projetu Estadu ne’ebé la’o iha Timor laran tomak ne’e sira nian, entaun hot-hotu sei bele hare ona ba planu estratejiku ne’ebé Estadu Timor Leste planeia ona. Maibé Xanana dehan, nia mós kompriende dezafius saida maka setor privadu sira infrenta dadauk ne’e.

“Imi (setor privadu) nia problema ne’e ita hotu hatene, ita koñese malu, problema mak kapasidade de finaseira. Tanba ne’e maka, tinan ida ne’e, tenki mosu duni banku ida atu fó apoiu ba imi, la’e dudu la ba,”dehan Xanana.tap

Jornal Nacional