Intervista Exlusivo CJITL ho Striker Futsal Feto Timor Oan iha Bandung

Bandung-Inovativu, Inspirativu no Intelijente nu’udar palavra tolu ne’ebe merese fo ba feto ran Timor oan na’in rua nulu resin rua (22) ne’ebe maske husik hela inan aman ho objektivu buka matenek iha tasi balun, maibe ne’on bo’ot atu foti Timor Leste la mukit husi sira nia hanoin.

Sira hamutuk na’in 22 ne’e, maske hela do’ok iha Bandung, Indonezia maibe hanoin no hakarak atu hamorin Timor Leste nia naran liu husi talentu futebol salaun sai inspirativu ba Timor oan sira seluk, liu – liu feto foinsa’e sira husi nasaun lafaek ida ne’e nian.

Centru Jornalista Investigativu Timor Leste – CJITL iha oportunidade kmanek ida hodi realiza intervista exlusivo ida ho jogador feto ida husi grupo Futebol Salaun Feto iha IMPETIL nian ou Ikatan Mahasiswa Pelajar Timor Leste hodi konta tuir istoria ne’ebe nia liu hamutuk ho nia maluk na’in rua nulu resin ida sira seluk.

Nia mak feto ran, isin mutin, lotuk oan husi Municipiu Covalima, Feby D’ Olsar ne’ebe joga iha grupo Futsal feto IMPETIL nian ho pozisaun avansadu ou STRIKER.

Feto klosan ho naran istimada Feby, hamutuk ho nia ekipa Futsal feto hahu grupo ne’e iha tinan 2012 ho joga hasoru ekipa oin oin hale’u nasaun Indonezia.

“Ami joga iha torneiu 20 de Maio nian, torneiu Natal no tinan foun no kampus nian, .ami contra tim futsal oin oin inklui futsal feto husi estudante Timor oan iha Jakarta no Jogja no ami sempre sai kampionatu ou juara satu dala ha’at ona” Feby hateten iha intervista ne’ebe kuaze la’o minutu tolu  nulu ne’e.

Tuir Estudante husi UNPAS Bandung, Departementu Teknik Planologi ne’ebe dadaun ne’e hakerek hela nia teze ne’e hateten katak kuaze membru hotu hotu iha futsal feto IMPETIL nian mai husi estudante feto Timor oan ne’ebe namkari iha universidade sira iha Bandung, Indonezia.

Feto ran ho okulista mutin ne’ebe moris ho zodiac  Aquarius ne’e (2 Feb 1991) mos hatutan liu tan katak durante joga iha torneiu sira nunka hetan apoiu husi ema ruma maibe apoiu hotu hotu mai rasik husi sira nia osan ne’ebe sira rai hamutuk hodi sosa farda no uza ba preparasaun jogu nian.

Bainhira CJITL husu, tamba sa mak hari futsal feto?  Feto ran oin bonita ne’e hatan “tamba husi halo tim futsal feto ne’e ami Timor oan hotu iha ne’e bela kaer malu nafatin no foti rai Timor nia naran morin liu tan, katak Feto mos BELE”.

Tuir Feby katak, konaba tempo jogu sempre aproveita tempo ne’ebe livre ou ferias foin. Ekipa ne’e rasik lidera husi treinador Timor oan mane ida ho naran Moises Natalino de Jesus naran bolu Amoi.

Ba Timor oan hotu, especialmente feto, Feby D’ Oslar haktuir nia mensajen “Ami husi Tim nia mensagen ba feto Timor oan hotu katak Ita feto mos bele hasai potensia ne’ebe mk colega feto sira iha, feto Timor oan hotu fo suporta malu ba atu halo Ita nia Rai Doben Timor Leste nia naran Morin iha parte desporto no iha parte seluk-seluktan”. (CJITL Bandung)