KOMUNIDADE SUSAR FIAR LIURAI DILI

Meius oi-oin governu implementa, to’o ikus aloka tan orsamentu lubuk ida ba kada suku iha sidade Díli atu kombate fo’er ne’ebé namkari iha kapitál Díli, maibé kapitál Díli kontinua fo’er tanba komunidade sira la fiar xefi suku (liurai) sira iha sidade Díli.

Eis Ministru Administrasaun Estatal,  Jorge da Conceição Teme, Kinta (26/03/201), iha Parlamentu Nasionál ba Matadalan hatete Díli nunka mais atu livre hosi fo’er tanba konsiénsia komunidade menus tebes atu kontribui ba hamoos sidade Díli.

“Xefi suku sira iha Díli ne’e ukun ema barak. Ema mesak matenek, ita nia ukun na’in sira mós ita nia xefi suku sira iha Díli ne’e ukun hotu. Tentativa hot-hotu governu halo ona maibé tanba de’it ukun iha sidade entaun ema barak la fiar xefi suku sira iha Díli,” Teme esplika.

Nia hatutan katak problema hamoos sidade Díli ne’e defisil tebes atu kombate tanba konsiénsia povu laiha liu. Ita nia ukun na’in sira mós dalaruma sa’e kareta maibé sempre soe fo’er ba liur. Nia esplika hahalok sira ne’e halo sidade Díli kontia fo’er ba bebeik.

Teme rekoñese katak programa governu aloka orsamentu ba suku sira iha sidade Díli ne’e failla duni iha ninia mandatu bainhira kaer kna’ar nu’udar Ministru Estatal.

Teme mós esplika katak maske VI Governu ne’e nia mandatu tinan rua (2) maibé defisil tebes atu kombate fo’er iha sidade Díli.

Tanba sa la implementa multa ou sansaun ba komunidade, emprezariu, loja na’in sira ne’ebé soe fo’er iha sidade Díli? Teme hatete “Ita ne’e seidauk bele implementa tanba mentalidade ema ohin loron katak uluk ha’u luta, uluk ha’u terus. Dalaruma ita ba halo monitorizasaun, projetu la la’o, ita husu atu fó fali osan maibé sira dehan o mai ha’u hein ho katana, ha’u uluk luta, terus. Tanba ne’e defisil tebes atu ita implementa sistema multa iha sidade Díli”.

Ministru Estadu Koordenadór ba assuntu Administrativu, Ministru Administrasaun Internu, Dionísio Babo Soares dehan, problema lixu ne’ebé governu anteriór aloka ona orsamentu balun ba kada suku, maibé VI governu iha ona planu atu hadi’a programa refere tanba hein orsamentu própriu ne’ebé sei aprova iha Parlamentu Nasionál.

“Tanba ne’e mak ministériu hamutuk hela administradór Munisípiu Díli ho vise ministru no mós ho ekipa sekretáriu estadu ho Ministériu Estatal buka hela  maneira ida atu mai ho pakote integradu,” Dionísio hatete.

Nia esplika oras ne’e Ministériu diskuti hela atu muda fali polítika lixu nian ne’e ba fali sistema serbisu entre ministériu ho seitór privadu, para depois ninia jestaun ida ne’e integradu di’ak liu atu bele akomoda ema hotu-hotu.

Deonísio esplika programa hamoos sidade Díli hodi tama sai baerru ne’e tenki hala’o, tanba Díli ne’e sai hanesan kapitál ba Nasaun Timor-Leste, bainhira bainaka  estranjeiru sira mai vijita ita nia rain maka ita nia nasaun rasik nakonu ho fo’er ne’e ita nia dignidade ba nasaun ida ne’e tau iha ne’ebé.

Prezidenti Komisaun E Parlamentu Nasionál trata assuntu Infraestrutura no Telekomunikasaun, Pedro dos Mártires da Costa hatete, progarama ne’e hosi Ministériu Admistrasaun Estatal, V Governu mak dehan atu halo Díli ne’e sai sidade moos no sidade páz, maibé to agora nunka realiza, tanba ninia programa ne’e laiha.

“Díli ne’e atu sai furak tenki iha programa ida no orsamentu ida, maibé laiha orsamentu ida atu apoia programa ida ne’e, ba futuru tenki lansa palavra ida, orden ida no iha orsamentu atu fó apoia sustentavel ba programa ne’e hodi bele la’o ba oin,” Pedro dehan.

Pedro esplika programa hamoos suku ne’e foun-foun governu haruka $1000.00 mill dolares amerikanu ba baerru ida, maibé baerru ida gasta semana ida hotu tiha ona, tanba laiha organizasaun ida ne’ebé atu responsavel ba programa ne’e.

Iha parte seluk Xefi Suku Becora, António da Sílva hatete katak projetu ne’ebé realiza hosi governu rasik la la’o até agora, tanba fo’er sira ne’ebé soe arbiru iha fat-fatin ne’e tanba hahalok estudante no komunidade sira soe fo’er arbiru tun sae.

“Programa limpeza tama sai baerru oras ne’e la la’o hahuu hosi fulan Janeiru to’o mai agora tanba iha mudansa  remodelasaun V  Governu ba VI Governu Konstituisionál. Ho ida ne’e maka to’o agora dadaun programa ne’e rasik  seidauk realiza hodi hamoos fo’er tama sai baerru sira iha área Kapitál Díli ne’e Rasik,” António dehan.

Nia hatutan, iha tinan kotuk projetu ne’e la’o, traballadór sira mai hosi kada aldeia ema na’in lima (5) no serbisu rotasaun, traballador ne’ebé serbisu ba programa ne’e kada ema ida (1) hetan osan dolar 4. (Mj4/Mj7)

Matadalan