PR TAUR MATAN RUAK: “JOVEN TENKI SAI DÍNAMO DEZENVOLVIMENTU”

Prezidente Repúblika (PR), Taur Matan Ruak, husu ba Juventude Timor Oan tomak tenki iha Espiritu kreativu no vontade ne’ebe as atu sai dínamo ba prosesu dezenvolvimentu nasional.

Prezidente Repúblika, Taur Matan Ruak, lia tun dehan, problema bot ida iha Timor- Leste maka presiza tau matan ba joven sira, tanba iha TL 50% ka metade husi populasaun ne’e mesak juventude.

“Joven sira iha obrigasaun tenki sai hanesan dinamu ba Dezenvolvimentu Nasional nian ba ida ne’e espiritu krativu, vontade As atu hetan dalan hodi fo imi nia kontribuisaun ne’ebe maka’as liu ba ita nia Nasaun,” dehan PR Taur liu bainhira hala’o vizita ba Estudante SOLS, Suku Kribas, Postu Manatuto Vila, Munisípiu Manatuto, Sabadu (23/05/2015).

PR Taur hateten, Timor-Leste presiza integra joven sira iha sistema Edukasaun formal no naunformal, enkuadra sira iha esforsu Nasaun nian ba halo dezemvolvimentu Nasaun hodi emprega no hetan servisu ne’ebe sai dezafiu bot.

PR Taur husu ba Estudante SOLS sira katak, iha fatin barak joven sira ohin loron komesa fo an atu servisu la hanoin sai funsionariu Estadu, halo to’os, halo Natar la hare ba ida ne’e, maibe iha barak mak sei hanoin katak dezemvolve Timor mak funsionariu hodi buka fatin iha eskritoriu, maibe hanoin ida ne’ebe lalos.

Prezidente Republika mos dehan katak, nia foin mak primeira ves vizita SOLS, durante ne’e nia rona deit naran mais seidauk ba dereitamente, ne’ebe vizita primeiru nia ba iha suku Kribas nian.

Iha fatin hanesan Kordenador SOLS Rejiaun Leste, Paul dos Santos Borges, hatete SOLS iha Rejiaun Leste mak hanesan Laklubar, Natarbora, Soibada, Laclo, Laleia no Kribas, loke SOLS ho Objetivu atu fo Edukasaun diak ba Estudante sira iha Munsípiu.

“Ami nia Objetivu mak atu fo Edukasaun diak ba Estudante sira iha Municipiu hodi hanorin, Komputador, Ingles, Disiplina, Matematika, Hahalok, Fiar Aan hodi hambrik iha oin liu-liu iha publiku,” dehan Paul.

Nia hatutan, Estudante sira hala’o Estudu durante Fulan hitu iha Sols Distritu remata kontinua Estudu tan Fulan hitu iha Dili kuandu test liu mak sei hanorin estudante sira iha Municipiu no mos bele buka Servisu seluk ne’ebe mak sira hakarak.

Manuel de Deus nudar estudante SOLS senti kontente, tamba Prezidente Republika bele vizita sols foin primeiraves, vizita ne’ebe mak iha prezidente konsege fo lia menon no motivasaun atu nune’e bele halo estudu diak liu tan ba oin.

Remata Vizita SOLS, Prezidente Repubika Taur Matan Ruak kontinua hala’o Vizita ba iha Fatin Hakiak manu Timor ne’ebe hetan Apoiu husi Ministeriu Agrikultor iha Suku Kribas Munisipiu Manatuto. May

Jornal Nacional