TROKA LA-SAMA, TENKI EMA INDEPENDENTE

Eis Prezidenti Partidu Sosial Demokrata (PSD), Mário Viegas Carrascalão sujere ba Xefi Governu Rui Maria de Araújo katak, atu troka saudozu Fernando La Sama de Araújo ba Ministru Koordenador Asuntu Sosial no Ministru Edukasaun ne’e, Governu tenke hili ema independente ida, labele depende liu ba Partidu.

Mário Carrascalão hatutan, PM Rui bele hili ema iha liur la signifika la respeita ideia husi lideransa sira Partidu Demokrátiku (PD) nian, ne’ebé hakarak atu kontinua mehi saudozu La Sama nian iha pasta importante ne’e.

“Edukasaun ne’e lalika ema partidu di’ak liu tan, hili de’it ema indepedenti ka ema liur ne’ebé iha kapasidade, tanba oras ne’e ema Timor-oan naton ona atu priense kondisaun 100%, talves la’e karik, pelo menus 80%, importante mak honestidade no iha kompeténsia duni atu jere polítika edukasaun,”katak Carrascalão ba jornalista iha Hotel Timor Dili, Segunda (20/07).

Carrascalão haktuir, maske agora PM Rui iha nia laran hatene ema se mak Xefe Governu ne’e atu hili, maibé politikamente tenke konsulta ho Maun bo’ot Xanana hanesan Prezidente partidu mais votadu.

Carrascalão dehan, maske pozisaun La-Sama nian to’o agora Vice Ministra Dulce mak sei subtitui hanesan Ministra Interina Edukasaun, maibé ida ne’e susar tebes ba nia atu foti lalais desijaun ruma hodi rezolve problema edukasaun iha rai laran.

Maibé Carrascalão dehan, ida ne’e kompetensia Primeiru Ministru Rui Araújo nia kompetensia atu hili ema hodi garantia servisu edukasaun to’o tinan ruma remata.

Carrascalão mós dehan, tuir nia haree, Vise Ministru sira ne’e mós priense kondisaoens bele troka saudozu La-Sama.

“Ita haree intermus de kapasidade lideransa, inklui mós aspeitu integridade,” afirma Carrascalão.

Nia hatete katak, Timor iha kultura tradisionál, tan ne’e prolonga tempu to’o loron 60 mak Governu troka La Sama mós laiha problema.

“Mas liu tiha ida ne’e ona, ita nia moris ne’e tenke ba oin nafatin, ne’e duni tuir ha’u nia hanoin labele hein to’o kleur demais, mas kuandu ema laran la priense kriteria tenke buka ema husi liur,”relata Carrascalão.

Nia esklarese, ba kargu edukasaun ne’e, bele mai husi ne’ebé de’it, bele husi FRETILIN, tanba ida ne’e Governu inkluzivu. Edukasaun ne’e hanesan pasta ida que importante tebe-tebes ba ita nia rain.

Tuir nia katak, se bainhira PM Rui koñese nia maluk balu ne’ebé iha koñesementu klean kona-ba edukasaun, bele nomeia sai Ministru Estadu Koordenadór Asuntu Sosiais no Ministru Edukasaun.

Entretantu, Sekretriu Jeral PD, Mariano Sabino entrega ona lista kandidatu husi lideransa PD nian nain 8 ba PM Rui atu hili, maibé too agora PM seidauk desidi.cos

Jornal Nacional