STVJ KAPASITA JUVENTUDI

Diretora Sentru Treinamentu Vokasional Juventudi Comoro (STVJ), Filomena de Jesus Pinto Filipe hateten, STVJ ninia objetivu atu fó kapasitasaun ba juventudi hirak ne’ebé maka la kontinua sira nia estudu atu nune’e sira bele prepara sira nia-an para kontribui ba dezenvolvimentu nasaun.

“Treinamentu ida ne’e atu fó kapasitasaun ba juventude sira iha areia oioin ho nune’e bele fó spasu ida ba juventudi atu kompete ba vagas no kontribui mós ba dezenvolvimentu nasaun, treinamentu ne’e ho kualifikasaun nasionál hanesan kursu Fundasaun, Administrasaun, Hospitalidade Jerál, Hospitalidade Produsaun Hahan, Treinamentu Noviasaun, Treinamentu Avaliasaun, Sales Force no Customer Service”, informa Filomena iha ninia kna’ar fatin STVJ Comoro, Segunda (20/07).

Nia afirma, treinamentu ba juventudi ne’e gratuita, maibé kona-bá treinamentu área avaliasaun ne’e otomatikamente tenke selu.

“No ida ne’e ami forñese formasaun ba treinadór husi ONG, kooperativa ou instituisaun hirak ne’ebé maka hakarak atu hasa’e kualifikasaun kada kursu ida ema ida US $ 600.000, durasaun kursu kada área iha STVJ Comoro ne’e fulan 6″, hateten nia.

Nia hatutan katak, durante ne’e STVJ la hetan apoiu fundus ruma husi doadores ka governu.

Maibé buka fundus rasik husi rezultadu treinamentu ne’ebé STVJ hala’o.

“Purezemplu ami fó treinamentu ba NGO ruma ou instituisaun ne’ebé maka husu ami oferese treinamentu ba sira, sira bele mai ami nia sentru para halo kontratu ho ami ho nune’e ami oferese treinamentu ba sira i sira mós tenke selu ami”, hateten Diretora STVJ Comoro.

STVJ Comoro hari’i iha tinan 2008 ho treinadu na’in 25, tinan 2009 treinadu 25, tinan 2010 treinadu 60, tinan 2011 treinadu 60, tinan 2012 treinadu 65, tinan 2013 treinadu 65, tinan 2014 treinadu 182, tinan 2015 treinadu hamutuk 42.

Nia hatutan tan katak, STVJ ne’e iha fatin 5 ida maka Comoro, Bairo-Pité, Camea, Gleno no Manatuto.

“Ami iha planu atu loke tan maibé ami nia difikuldade ida maka finansial tamba agora dadauk ami la hetan suporta husi SEPFOPE”, katak nia.

Filomena de Jesus Pinto haklean katak, iha instituisaun barak maka hakarak atu kolabora no servisu hamutuk ho STVJ para fó treinamentu iha munisípiu.

“Maibé ami laiha kapasidade atu harii sentru iha munisípiu entaun metode ami uza maka haruka ami nia treinadór sira ba de’it karik iha grupu balun maka hakarak tuir fórmasaun”, hateten Filomena de Jesus Pinto. Entretantu, Carlos Martins de Deus nu’udar treinadu STVJ Comoro hateten, sente prosesu aprendizajen durante iha STVJ ne’e diak tebes tamba bele aprende buat barak ne’ebé maka durante ne’e nia seidauk hatene.

“Maibé durante treinamentu ne’e mós ami hasoru difikuldade hanesan fou-foun ami tuir intervista iha ne’e sira koalia dehan área Fundasaun ne’e ninia durasaun fulan 6 maibé to’o iha klaran kansela tiha ba fulan 4 ida ne’e halo ami la satisfas”, Carlos de Deus dehan.ves

Jornal Nacional