DESKONFIA POLISIA BALUN AFETA HIV/SIDA

Komandante Unidade Asistensia Saude Polisia Nasional Timor Leste, Inspektur Polisia Abilio de Araujo Gonzalves nudar mos Direktur Klinika PNTL, informa katak iha polisia balun mak deskonfia afeita ba moras HIV/SIDA.

“Sim deskonfia iha, iha ne’e mos hau nia strutura mos iha ona seksaun ida mak atende ba iha neba,” hatete, Abilio A. Gonzalves, ba JNDiário, Kinta (16/07/2015), iha nia knar fatin, Kaikoli, Dili.

Tanba ne’e, Diretur Klinika PNTL esplika, husi deskonfiansa polisia balun afeita virus HIV/SIDA, iha sekasaun nebe atende dereita husi Doutora Analita ho Sarjentu Surjana liu husi izaminasaun saude i segredu no husi rejultadu ne’e kompetensia tomak komandante jeral mak bele fo sai informasaun refere.

“Buat hotu-hotu liu husi izaminasaun ran depois mak bele hetan rejultadu ida ne’e, maibe la fasil i segredu, ida ne’e hau labele fo sai, ne’e so komandante jeral mak bele fo sai nudar ema tutela primeiru homen iha Instituisaun PNTL.” Abilio hatete.

Abilio reforsa, husi polisia nebe mak deskonfia afeita moras ne’e hetan tratamentu normal iha fatin taratamentu saude nian. Tanba ne’e parte Polisia nian sei servisu hamutuk ho komisaun HIV/SIDA, nune’e bele halo identifikasaun nebe mak detailadu.

Abilio fundamenta katak, unidade asistensia saude polisia kontinua esforsu bele hatene lolos membru polisia hirak mak deskonfia afeita ba moras HIV/SIDA ne’e porsentu barak ou ituan.

Maiske iha komitmentu nebe mak bo’ot husi Unidade Asistensia Saude Polisia ne’e kontinua emfrenta defikulidade ekipamentus, maibe la sai bareira unidade ne’e kontinua servisu no esforsu mak moto nebe mak la seis husi unidade refere.

“Defikulidade iha, maibe labele husu demais ami tenke servisu uluk lai, servisu uluk mak ami sei husu, ituan-ituan responde ona husi ami nia komando,” Nia hatete.

Tanba durante ne’e, unidade asistensia saude polisia servisu hamutuk ho UNFPA durante tinan 2014 to agora. I antes apoia materia sira ne’e tenke iha planu, portantu ekipamentus nebe mak komando fasilita bele halao servisu.

Rekursu humanus sufsiente, mediku publiko nain 6, no Unidade ne’e mos iha planu sei relata ba komando hodi haruka mediku balun sei ba estrangeiru hodi haforsa liutan Unidade Asistensia Saude Polisia. Eus

Jornal Nacional