KASINU LORI DROGA NO PROSTITUISAUN MAI TL

Advogadu Dr. Manuel Tilman hatete jogu kasinu ne’ebé oras ne’e dadaun loke ona iha Timor-Leste sei lori droga, prostituisain no tráfiku umanu mai Timor, tanba ne’e di’ak liu taka tiha de’it.

“Klaru katak kasinu ne’e impaktu maka’as ba ita nia kultura, bele oho malu, oho-án, droga no prostituisaun. Kasinu ne’e halo terus família, fasilita droga, prostituisaun, tráfiku umanu, lanuten, fuma de’it,” Tilman dehan kestaun ne’e ba Matadalan, foin lalais ne’e, iha nia serbisu fatin Beach Garden Hotel, Pantai kelapa, Díli, relasiona ho droga no tráfiku umanu ne’ebé oras ne’e buras iha Timor-Leste.

Eis Deputadu Bankada KOTA ne’e esplika katak sé governu la fó atensaun ba problema kasinu maka ita sei estraga família iha Timor maka ita nia nasaun sei nakdoko ho ameasa mundu nian hanesan droga, prostituisaun, nst.

Nia hatutan ohin loron ita laiha regra ida ne’ebé rigorozu hodi regula jogu kasinu iha Timor-Leste tanba ne’e ema livremente halo negósiu ilegál barak iha laran. “Ha’u maka ukun rai ne’e kasinu ha’u taka tiha. Ha’u la presiza osan hosi kasinu,” dehan Tilman.

Hatán ba lei Timor autoriza ka lae kona-ba loke kasinu, tilman dehan “uluk ita loke Lotária Populár maibé agora sai tiha fali Lotária Timor Plaza, Lotaria Audian”.

Tilman esplika katak Lotária Populár ne’e hanesan jogu ki’ik sira hanesan joga karta, futu manu, nst, ne’ebé ho osan ki’ik, maibé kasinu ne’e joga osan boot, bele mós involve droga iha laran.

“Buat ida át liu maka kasinu ne’e. Osan laiha mós kaer projeitu ba joga fali iha Audian ho Timor Plaza. Ha’u maka Primeiru Ministru ha’u taka. Estadu la presiza impostu ida mai hosi kasinu ne’e,” Tilman dehan.

Nia haklaken katak kasinu ne’e rasik la fó impostu ida boot ba estadu maibé lori problema boot ba estadu no família sira ne’ebé toman át ba joga jogu kasinu refere.

“Osan ida mai hosi kasinu ne’e ita kompara karik halo terus liu fali família iha uma laran. Buatamak sira be ba joga iha Audian ne’e lakon tiha osan ba inan, oan no sira be hela iha uma ne’e. Dalaruma nonoi oan sira ho vistidu tuk tan iha ne’ebá entaun katuas sira la sai hosi ne’ebá,” Tilman lamenta. (Efrem)

Matadalan