PN Halao Audensia Defeza-Seguransa Taka ba Publiku

DILI - Reprezentante povu iha Uma Fukun Parlamentu Nasional (PN) halao audensia publika ho Ministru Defeza no Interior, maibe taka ba publiku.

Tuir Vise Prezidente PN Aderito Hugo katak enkontru neebe halao koalia konaba asuntu defeza no seguransa nian, maibe taka ba publiku neebe sempre halao regularmente.

Ami koalia asuntu defeza seguransa nian tan nee taka ba publiku, enkotru nee laos foun ida regularmente parlamentu halao ho entidade sira,” dehan Aderito ba Jornalista Kuarta (27/04/2016) iha PN.

Nia hatete enkontru neebe mak halao laos konsumu publiku nian, maibe kestaun defeza no seguransa kobre buat hotu-hotu. Karik koalia konaba nomeasaun Major Jeneral foun, Hugo hatete husik interpretasaun publiku, maibe enkontru nee laos konsumu publiku.

Iha fatin hanesan Xefi Bankada CNRT Natalino dos Santos hatete enkontru neebe mak halao koalia konaba kondisaun defeza no seguransa nian ba situasaun iha Timor laran tomak.

Nune mos Ministru Defeza Cirilo Cristovao hatete enkontru neebe mak halao taka ba publiku, tan nee labele koalia ba publiku. “ Enkontru porta Feixada neebe hau labele koalia,” dehan Cirilo.

Iha enkontru neebe halao iha salaun enkontru PN lao kuaze oras hat nia laran, neebe hetan partisipasaun husi Komandante PNTL Komisariu Julio Hornay, Ministru Interior Longinhos Monteiro, Ministru Defeza Cirilo Cristovao, Prezidente PN Vicente Guterres ho Kompizisaun Meja, Prezidente komisaun B asuntu Defeza no Seguransa David Dias Xinemes, Xefi Bankada Hat iha PN. Informasaun kompletu iha STL Jornal no STL Web, edisaun Kinta (28/4/2016).  Timotio Gusmao

Suara Timor Lorosae