Investiga Kazu Oknum PNTL Baku F-FDTL, Tenki Suspende Autor Provizoriu

DILI - Kazu Deskonfia Oknum Polisia Nasional Timor Leste neebe baku Membru Falintil Forsa Defeza Timor Leste (F-FDTL) iha Balibar, neebe iha prosesu Investigasaun tenki Suspende Autor.

Tuir Prezidente Komisaun B Parlamentu Nasional Asuntu defeza no Seguransa David Dias Ximenes katak sidadaun sira sempre aprezenta sira keixa kona ba polisia nian ho faktus oin kanek, bubu.

Ofensa korporal iha kodigu penal krime, investigasaun tan nee tenki halo suspensaun provizoriu no sasaun administrativa kedas depois mak lori ba iha prosesu kriminal,” dehan David ba Jornalista Kuarta (18/05/2016) Iha Parlamentu.

Nia hatete oras nee halo ona investigasaun, tan nee hein deit rezultadu kuandu iha duni evidensia mak ofensas korporal, polisia laos funsionariu publiku, tan nee tenki fo sasaun administrativu no halo suspensaun ba membru neebe halo krime.

Iha fatin ketak Ministru Defeza Cirilo Cristovao hatete akontesementu neebe mak iha mai husi Individu PNTL nia laran neebe mak halo Agresaun fiziku hasoru membru F-FDTL, tan nee forma ona ekipa hodi halo Investigasaun.

Nia hatutan investigasaun ba kazu baku malu nee halao ona tanba Maijor Jeneral, Lere Anan Timur, hasoru malu ona ho Komisariu PNTL, Julio Hornai, hodi inkontru no koalia konaba problema no wanhira identifika se mak sala, maka sei foi desizaun tuir ida-ida nia regulamentu tantu PNTL nomos F-FDTL.

Nunee mos Komandante Jeral PNTL Komisiariu Polisia, Julio Hornay hatete, la iha toleransia ba membru ida halo infrasaun kontra regras no servisu, kona ba kazu nee komandu PNTL sei suspende membru neebe mak involve hodi submete ba prosesu investigasaun. Informasaun kompletu iha STL Jornal no STL Web, edisaun Kinta (19/5/2016). Timotio Gusmao

Suara Timor Lorosae